Mittarfeqarfiup nuunneqarnissaa inassutigineqarpoq
Naalakkersuisut Assartuussineq pillugu isumalioqatigiissitamut piumasarisimassa inaarutaasumik nalunaarusiaq killilerneqarsimasoq ukioq manna julip aallartinneranut naammassineqanngitsoorpoq.
Taarsiullugu isumalioqatigiissitap kujataani angallaneq pillugu isumaliutaagallartoq, qanittukkut tamanut saqqummiunneqartoq, naammassivaa. Tassani isumalioqatigiissitap apeqqutit pingaarnerit ilaat suliarisimavaa, tassalu kujataata qitiusumik mittarfeqarfia Qaortumut nuunneqassanersoq?
Isumalioqatigiissitap inassuteqaataa ersarippoq, aap nuunneqassaaq. Nunatta kujataani innuttaasut Qaqortumi Narsami Nanortalimmilu najugaqarput, tamarmillu Narsarsuarmut ungasillutik, angalasullu Narsarsuarmuinnaq ingerlaneq ajorput. Taamaattumik inuiaqatigiit aningaasarsiornikkut ingerlanerat eqqarsaatigalugu imminut akilersinnaanerussaaq mittarfik Qaqortumut nuunneqarpat, isumalioqatigiissitaq inerniliivoq.
Taakku saniatigut isummerfigineqartussaapput mittarfik Qaqortup eqqaani sumut inissinneqassanersoq, aamma mittarfiit qanoq takitigissanersut. Isumalioqatigiissitap inassuteqaatigaa siullermik mittarfik 1199 meterinik takissuseqassasoq. Mittarfiup naannerup toqqarneqarnerata kingunerissavaa timmisartut tamarmik nunnissinnaannginnerat Danmarkimullu ingerlasinnaasut missinnaannginneri. Qeqertaasami Kuannersuarnilu aatsitassarsiornerit aallartissapata takinermik mittarfik eqqarsaatigineqaqqissinnaavoq, isumalioqatigiissitaq naliliivoq.
Qaqortumik mittarfeqarnissaa toqqarneqassappat isumalioqatigiissitap inassutigaa Narsap Qaqortullu akornanni aqquserniortoqassasoq ikaartaatilimmik, taannalu aqqusineq mittarfimmut aqqusinermut atasuussasoq, apeqqutaatinnagu mittarfiup sumi inissinneqarnera, aamma mittarfik Nuupilummi Eqalugaarsuit killerniluunniit talittarfinnut attavilerneqassaaq.
Isumalioqatigiissitap aatsaat inaarutaasumik nalunaarusiani kujataani helikopterimik angallanneq imaatigut angallannermik taarserneqassanersoq isummerfiginiarpaa, ilanngullugu Narsami Nanortalimmilu nalinginnasunik mittarfiliortoqassanersoq, taamaaliornikkut helikopterinik angallanneq unitsikkiartuaarlugu.
Taaku saniatigut isumalioqatigiissitap kiffartuussilluni isumaqatigiissutit, unammilleqatigiinnermut tunngasut, inunnut tunngasut, sinersorluni angallannemit timmisartumut angallannermut nuussineq, Mittarfeqarfiit suliaat, aningaasaliinerit allallu isummerfigisussaavai.
Isumalioqatigiissitap isumaliutersiissutip ukiup naanerani naammassinissaa naatsorsuutigaa.
