Mittarfeqarfiit amigartoorutaat ikileriarsimapput
Ukiup siulianut naleqqiullugu tamanna pitsaaneruvoq, 2012-imi amigartioorutit 9,9 millionit koruuniummata.
Naallu naatsorsuutit pitsanngoriaateqaraluartut, Mittarfeqarfiit ingerlanneqarnera suli pitsaanerusinnaasoq, pisortaata Jens Lauridsenip oqaatigaa.
Suliassat Namminersorlutik Oqartussat suliffeqarfiutaasa ilaannut nuunneqarnerisigut tamanna ilaatigut anguneqarsinnaasoq, pisortap oqaatigaa:
- Mittarfeqarfiit mittarffinnik ingerlatsisussaavoq, assigiinngitsunilli taassuma saniatigut aamma ingerlataqartoq inuppassuit ilisimavaat. Innaallagissiorfiit aqunneqarput, akunnittarfiillu marluk aqunneqarlutik, soorlu aamma suliassat assigiinngitsut taakku saniatigut maanna aamma isumagineqartut, pingaartumik Kangerlussuarmi Narsarsuarmilu. Suliffeqarfiulli sunik ingerlatsinissani ingerlatsinnginnissanilu misissortariaqarpaa, misissortuartariaqarlugulu. Suliffeqarfiimmi allat Mittarfeqarfiit maanna suliaasa ilaannik ingerlatsisuugaluarpata pissusissamisoornerussagunaraluarpoq, Mittarfeqarfiit pisortaat Jens Lauridsen oqarpoq.
Mittarfeqarfiit 2012-imi 9,9 millionit koruuninik amigartooruteqarpoq, siornalu 2013-imi 3,4 millionit koruuninik amigartooruteqarluni. Timmisartuussinerit taamaaginnanngikkunik ikileriarsimagaluartut, Nunatsinnilu aningaasarsiorneq ataatsimut isigalugu appariarsimagaluartoq amigartoorutit ikilipput. Sipaarniarnerilli assigiinngitsut, pisiortornermilu politikki nutaaq atorneqalermat, amigartoorutit ikilisinneqarsinnaasimasut, Mittarfeqarfiit pisortaata oqaatigaa.
Nunatsinni timmisartukkut angallannerup isumannaatsuunissaa, inuiaqatigiit ataatsimut isigalugit sullinnissaat, suliffeqarfiillu namminersortut assigiinngitsut sullinnissaat, Mittarfeqarfiit isumagisassaraat, akunnittarfiillu marluk, tassa Kangerlussuarmiittoq Narsarsuarmiittorlu, aamma ingerlataralugit, tamakkualu malitsigisaanik aningaasartuuteqartarluni:
- Ataatsimut tamakku kattukkaanni amigartooruteqartarpugut, Jens Lauridsen oqarpoq.
Suliassalli ilaasa kikkunnut, qaqugulu, tunniunneqarsinnaanissaat, Mittarfeqarfiit pisortaata eqqoriarsinnaannginnerarpaa, suliassalli Namminersorlutik Oqartussat suliffeqarfiutaasa ilaannut nuunneqarsinnaanissaat pillugu suliaq aallartereersoq, Mittarfeqarfiit pisortaata oqaatigaa.
Mittarfeqarfinni sulisut 450-it missaanniipput, Nunatsinnilu timmisartukkut angallannerup isumannaatsuunissaa qulakkiissallugu Mittarfeqarfiit suliassaraat, mittarfiit katillugit 13-it, qulimiguullillu mittarfii katillugit 46-t ingerlannissaat akisussaaffigalugu.
