Missingersuutit akuerineqartut
Kommuneqarfiit maannamut apersorneqartut kommunenut akileraartitsisarnermikkut assigiinngikkaluarlutik qaffaasimanngillat.
Aallarniutigalugu taasinnaavarput, Sisimiut Kommuneani ukiup tullianimut missingersuutini aningaasanik amigartoornissaq 40 millioni koruuniunissaat ilimagineqarmat, tamannali aqunneqarluarpoq, kommunep karsia aningaasaateqarluarmat. Sisimiuni akileraarut 25 procentimiiginnassaaq.
Qaanaap kommunia ukiup tullianimut akileraarutissaa 29 procentiusoq qaffasinnerpaavoq, allanngortinneqaranilu, missingersuutit kommunalbestyrelsemit akuerineqartut Kommunit Nakkutilliisoqarfianit akuerineqaqqaassapput.
Qasigiannguit kommuneat aamma 29 procentimik akileraaruteqartitsissaaq. Ivittuut Kommuneat akileraartarnermut akileraarut 20 procentimiisiinnassavaa, tamannalu appasinnerpaavoq.
Nanortallip kommuniani missingersuutini aningaasanik 13,7 millioni koruuninik amigartooruteqarnissaq ilimagineqarpoq, kommunillu aningaasatigut ingerlalluarneratigut tamanna akuerineqarsinnaasimavoq, akileraarutillu 26 procentimiisiinnarneqassaaq.
Maniitsup kommuniani aningaasanik amigartoornissaq aamma ilimagineqarpoq, tassani 3,1 millioni koruunit amigartoorutigineqassammata, akileraarutillu 26 procentimiiginnassapput. Amigartoorsinnaanermulli akuersineq sillimmasiisarfinnit 2 millioni koruuninnaanissaq ilimagineqarmat pisinnaasimavoq, amigartoorutissat 1,1 milllioni koruuniussallutik.
Upernaviup kommuniata akileraarutaa 26 procentiuinnassaaq, aningaasanillu 2,8 millioni koruuninik sinneqartoornissaq ilimagineqarluni.
Ilulissat Kommuneani kommunalbestyrelsemit akileraarut 27 procentiussasoq akuerineqarpoq, 1 millioni koruuninillu sinneqartoornissaq ilimagineqarluni.
Illoqqortoormiut Kommuneani akileraarut 27 procentiuinnassaaq, missingersuutinili naatsorsuutit oqimaatigiissapput
Aasiaat Kommueani 1,5 millioni koruunit sinnerlugit sinneqartoornissaq ilimagineqarpoq, tassani fabrikkip ammaqqinnissaa pissutigineqarluni. Akileraarullu 28 procentiuinnassaaq.
Narsap Kommuniani akileraarut aamma 28 procentiussaaq, aningaasallu karsimiittuutigineqartussat 5,4 millioni koruunissapput.
Ammassallip Kommunea aamma Kangaatsiap Kommunea suli paasisaqarfiginngilagut. Qeqertarsuulu Kommuneani kommunalbestyrelse ukiup tullianimut missingersuutit akueriniarlugit ataatsimeeqatigiileruttorput.
