Missingersuutinik qaangeerujussuartut
Dronning Ingridip Napparsimmavissuani sanaartukkamut immikkoortup pingajuanut taaneqartumut, napparsimasunullu utaqqiisaasumik inissiigallartarfissamut, aningaasaqarnermut ataatsimiititaliaq immikkut ittumik 32,4 millionit koruuninik tapiissuteqaqqittariaqarsimavoq.
Allattoq Elisa Isaksen
decembarip 15-at 2010 05:50
Aningaasaqarnermut ataatsimiititaliap ataatsimiinneranit imaqarniliami oqaatigineqarpoq, naalakkersuisunut ilaasortap Jens B. Frederiksenip sanaartornerup ingerlanneqarnera ajuusaarutigisimagaa, Namminersorlutik Oqartussat sanaartornermut immikkoortoqarfianit naammaginanngitsumik aqutsisoqarneranit sunnersimaneqartoq oqaatigalugu. Napparsimmavissuup allilerneqarnera, inissiaatileqatigiiffimmut INI-mut maanna isumagisassanngortinneqarpoq.
Jens B. Frederiksenip oqaatigaa, aningaasatigut missingersuutinik qaangeerujussuarnermut, suliamik aqutsinerlunneq kisimi patsisaanngitsoq. Aammali nutaamik allatullu periuseqarluni qalialersuisimaneq patsisaaqataasoq.
