Missingersuusiornermi kukkuneq imaannanngitsoq
Tamatta kukkulluta naatsorsuisinnaasarpugut. Kisianni USA-mi naalakkersuisut kisitsiserpassuit pineqartillugit kukkullutik naatsorsuusioraangata, tamanna pitsaanngilaq.
Ukiuni missingersuusiorfiusuni 2011-mit 2020-mut 8532 milliardit dollarinik missingersuutitigut amigartoornissaq, præsident Barack Obamap oqaatigigaluarpaa.
Tamanna ingasaginaraluaqaaq. Maannali paasinarsivoq amigartoorutissatut missingiunneqartut, naatsorsuutigineqaraluartumit 1.200 milliardit dollarinik amerlanerusut. Taamaalilluni amigartoorutissatut missingiunneqartut 9761 milliardit dollariussapput.
USA-mi inatsisartut missingersuusiortarfianni nutaamik naatsorsuusiornermi tamanna erserpoq, tassani oqaatigineqarluni "naalakkersuisut amigartoorutissatut missingersuutaat 1200 milliardit dollarinik amerlanerusut."
USA-mi naalagaaffiup karsiani taama amigartoorujussuarneq, Obamap præsidentitut siulimi George W. Buship akileraarutitigut oqilisaasimanera angisuumik pisooqataasutut taavaa.