Aviisit Politiken, Estra Bladet taavalu Danmarkip Radioata arnaq taanna sammivaat, Ekstra Bladet-llu nittartagaani atuarneqarsinnaasut naapertorlugit kalaallit mamiatsassimaarnerat inuppassuarnit paasineqarsinnaavoq.
24-nimmi ukiulik taanna Kalaallit Nunaanniinngisaannarsimavoq.
- Kanngunaqaaq. Akuerineqarsinnaasariaqanngilaq. Unammillersinnaanermut inatsisinik unioqqutitsinerunngila?
Aammali kalaallit isornartorsiuinerat ilaasa paasisinnaanngilaat.
- Lise Kalaallit Nunaat sinnerlugu peqataaniarmat kalaallit nuannaarutiginiarlissuk, ilaat oqarput.
- Ilaalli aamma isumassarsilluarpoq. Angut taanna allappoq:
- Suna ajornartorsiutigaasiuk? Juliamut sianeriannguaritsi!
Arnap qallunaap peqataanissaanut toqqaasup, Peter Hadvardip, maanna eqqarsaatigilerpaa Lise kalaallimit taarserneqassanersoq.
Peter Hadvard marlunngornerup tungaanut eqqarsarfissaqarpoq, pinnerneqqusaannermilu Tyrkiami juunimi pisussami Kalaallit Nunaat sinnerlugu peqataarusuttut saaffiginnissinnaapput - sumorpiarli saaffiginnittoqarsinnaanersoq allassimanngilaq.