Misissuisut pisortatigoortuunngitsut aamma atorsinnaapput

Taama isumaqarpoq Århus Universitetimi nunat tamat akornanni naalakkersuinermik ingerlatsinermut ilisimatooq soraarneq Nikolaj Petersen:

- Qanoq aaqqissuussiniartoqarnersoq apeqqutaassaaq. Naalakkersuisut ataanni pisortatigoortumik ataatsimiititaliornikkut assigisaannilluunniit misissuisoqarsinnaavoq. Imaluunniit pisortatigoortuunngitsumik immikkut ilisimasalinnik inuttalimmik suleqatigiissitaliortoqarsinnaavoq, taakkualu kiffaanngissuseqarnerullutik misissuisinnaapput.

Pisortatigoortumik misissuinerup nakooqutigissavaa akuerisaasunik tunngaveqassagami, aammali aqqutissat aalajangersimaqqissaartut malittussaagamigit sanngeeqqutigissallugu. Soorlu Københavnimut inussiarnersumik apeqquteqartoqassaaq aamma København inussiarnersumik qinnuigineqassaaq Washington aperilaaqqullugu. Akissutillu annerusumik minnerusumilluunniit apeqqusernagit akuerisariaqarput. Misissuinerlu tassuunaqqullugu angusaqarfiungaarnavianngilaq. Danskit misissuiniarnerisa aamma tamanna ajornartorsiutigisussaavaat, Nikolaj Petersen oqarpoq.

Misissuisitat pisortatigoortuunngitsumik ingerlatsisut pisortanit ikiorneqarnissartik naatsorsuutigissanngilaat, taamaattorli nammineerlutik kiffaanngissuseqarnerullutik allagaatitoqqanik assigisaannillu misissuisinnaassapput, taamalu pineqartup paasisaqarfiginissaanut periarfissarissaarnerussallutik. Nikolaj Petersen isumaqarpoq.

- Misissuineq taamaattoq pisortanit ataqqineqannginnerugaluarluni paasisaqarnerujumagaanni pilerinarneruvoq.

Tamatumunnga assersuutissaqarnersoq Nikolaj Petersen aperineqarami akivoq, Pituffimmi pisimasut misissuiffigineqarnerat assersuutissaalluartoq. Nunanut allanut tunngasunik ilisimatusarfik DUPI, misissuisinneqalermat aatsaat iluamuik paasisaqartoqarpoq.

- DUPI Amerikamiunit ikiorserneqanngilaq, taamaattorli allagaatitoqqanik misissuisinnaatitaanini atorluarlugu misissuisunit pisortatigoortunit pissarsiaqarneruvoq, Nikolaj Petersen naggasiivoq.