Misissuisoqarnissaanut aningaasaliissutissat akueraat
![](/sites/default/files/styles/image_934x467/public/article_images/nuuk_havn_630.jpg?itok=7IHps_03)
Containerinut umiarsualiviliornissamut atatillugu teknikkikkut misissuisoqarnissaa Aningaasaqarnermut Ataatsimiititaliamit siullermik itigartitsissutigineqarpoq, kingornali paasinarsivoq, ataatsimiititaliaq tamakkiisoq itigartitsisimangitsoq - Demokraatit sinnerlugit ilaasortaq, Andreas Uldum misissuisoqarnissaanik tapersersuilluni akuersaarinnimmat.
Inuit Ataqatigiit akuersaartunut maanna ilanngupput, tassa ataatsimiititaliap Jens B. Frederiksenimik isumasioqateqanerata kingorna amerlanerussuteqartut akuersimmata, tassalu, 3,4 millionit koruunit aningaasaliissutigineqarlutik.
Aningaasaliissutigineqartut sanaartukkat suliallu allat naammassineqartut sinneqartoorutaannit nuunneqarput tassalu ukunannga sinneqartoorutit nuunnneqarput: Mittarfeqarfinnut aningaasaliissutigineqartut, Narsarsuarmi umiarsuliviup nutarterneqarneranit sinneruttut, Ilulissani mittarfiup sanaartorfigineqarneranit , Aasiannilu imeqarfiup nutarterneqarneranut aningaasaliissutit sinneqartoorutaat nuunneqarlutik.
Aningaasaqarnermut ataatsimiititaliami ikinnerussuteqarlutik ilaasortaapput, Aleqa Hammond Finn Karlsenilu Siumut. Taakkua qinnuteqaammut itigartitsinerminnut tunngavilersuutigaat, assartuussineq pillugu isumalioqatigiissitap isumaliutissiissutaa kalaallisuumut nutserneqarsimanngimmat, inatsisartunilu oqaluuserineqarsimanngimmat.
Containerinut umiarsualivissap piginneqatigiiffimmit ingerlanneqarlunilu pilersinneqarnissa eqqarsaataavoq, piginneqatigiit tassaallutik Kommuneqarfik Sermersooq, Royal Arctix Line, Namminersorlutik Oqartussat aamma Aalborg Havn.