Nunamineralsip geokemiske laboratoriaa nuumiittoq Canadamiullu suliffeqarfiutaanit Actlabs-Greenland-imit ingerlanneqartoq, sukkasuumik aatsitassanik misissuinermut atorneqartartoq, ammarneqarluni ingerlanneqalerpoq.
Aatsitassanik misissuipallatarnissaq ukiuni makkunani pisariaqaleriartuinnarsimavoq. Siornatigut arriippallaamik aatsitassanik misissuiniartarneq, Nuna mineralsimi suliniarnermut kigaallassaataasarsimavoq.
- Siornatigut aatsitassanik misissuinerit suliarineqarneri arriittangaarmata, aput nakkaalereeraangat misissukkat inerneri aatsaat naammassineqartarput. Misissuutillu nutaat atorlugit, sukkanerusumik misissuiartortoqarsinnaalerpoq NunaMineralsimi pisortaq, Ole Christiansen oqarpoq, nangillunilu: Naatsorsuinikka naapertorlugit, ukiuni pingasuni ujaqqat katersorsimasat, ukiup ataasiinnaap ingerlanerani misissorlugit naammassineqarsinnaapput.
Ujaqqat misissugassat, siornatigut 5 kilokkaarlugit Canadamut nassiunneqartarput, maannali Nuummi misissuisarfeqalermat, ujaqqat 30 gramikkaaginnaat nuummut nassiunneqartalerput. Taamaasilluni aamma assartuinermut aningaasartuutit sipaarneqartut Ole Christiansen oqarpoq.
Nuummi aatsitassanik misissuiviup aatsitassat misissugassat assigiinngitsut 160-it ullormut misissorsinnaavai.