Misissuinissamut aningaasaliinialerput
Nunat Avannarliit Ministerrådiata issittumi suliniutinut nutaanut 22-nut 8 millioni koruunit atorniarpai. Suliniutit assigiinngitsorujussuupput sammineqartussat ilaatigut tassaallutik avatangiisit, atugarissaarneq, aalisarneq, tuttuuteqarneq, silaannaap pissusaa aamma ilinniartitaaneq.
Atlantikup avannaani arferit suut uumasuuppat? Aamma qassiuppat? Nunat Avannarliit Ministerrådiat issittumi suliniutinut assigiinngitsunut 22-nut aningaasaliiniarluni aalajangersimavoq. Suliniutit ilagaat Atlantikup avannaani arferit amerlassusaannik nutaamik kisitsinissaq. Kisitsinikkut arferit amerlassusaat paasineqassaaq taamaalillunilu Atlantikup Avannaani siunissami nungusaataanngitsumik arfanniarnermik ingerlatsinissamut tunngaviussalluni.
Arferit saniatigut uumasunut tunngatillugu Nunat Avannarliit Ministerrådiannit tuttunut tunngasut millionip affaanik aningaasaliiffigineqarput. Suliniummi pineqarput tuttup neqaanik pitsaanerusumik tunisassiornissaq tuttuuteqarnermillu ineriartortitsinissaq.
Aammattaaq suliniutit naasunut tunngasut aningaasatigut tapersersorneqassapput. Suliniummi nutaami ivikkat nunatsinnilu naasut nakorsaataasinnaasut misissoqqissaarniarneqarput.
Suliniutini arlalinni sammineqassapput mingutsitsineq, silaannaap allanngoriartornera taakkualu kinguneri. Suliniutit marluk nunap inoqqaavinut tunngatinneqassapput. Ilaatigut nunap inoqqaavisa silaannaap allanngoriartorneranut qanoq naleqqussarnerat sammineqassalluni, ilaatigullu mingutsitsinerup peqqissutsillu imminnut ataqatigiinnerat misissorneqassaaq.
Aammattaaq issittumi suleqatigiissitamik pilersitsinissamut aningaasaliisoqarpoq. Matumani sammineqassallutik nunap inoqqaavisa pisinnaatitaaffii, nunamik piginnittussaaneq aamma pinngortitami pisuussutinut piginnittuuneq. Suleqatigiit 2007-imi maajimi FN-ip ataatsimiinnissaanut piareersarnermut tapertaassapput. Tamakkua saniatigut millionip affangajai 2008-mi Nuummi ilisimatusarneq pillugu ataatsimeersuartitsinissamut atorniarneqarput.
8 million koruunit issittumi suliniutinut atorneqartussat Nunat tamat akornanni Issittup Ukiuinut ukiormanna marsip aallaqaataanit aallartittusanut atatillugu aningaasaliissutaapput.
