Misissuinerup oqaasertai akuersaarneqarsimanngillat
Taamanikkut misissuinerup inernerani qallunaat naalakkersuisui pinngitsuutinneqarput.
Tamannarpiarlu tunngavigalugu, kalaallit aallartitaasa misissuinermullu ilaasortaasut inerniliussaq atsiorusussimanngilaat. Tamanna pisoq erserpoq, Ritzauip pisumut allagaatinik takunnissinnaanermik qinnuteqarnerisa kingorna.
Nunanut allanut pisortaqarfimmi pisortaq, Inuuteq Holm Olsen misissuinermi ilaasortaasimavoq, taassumalu pisup killiffia ima nassuiarpaa:
- Taamanikkut suliaq naammassivinneqarsimanngilaq, taamaattumilluuna taama inerniliisoqarsinnaanngimmat taama qisuariartugut. Imaanngilarli inerniliineq tamaat isumaqataaffiginngikkipput, kisianni tassa suliap inerneraa, amerikamiut oqarusunngimmata tigusanik ilaasoqarlutik Nunarput aqqusaartarsimaneraat allatulluunniit iliortarsimanerminnik oqarusugatik, Inuuteq Holm Olsen oqarpoq.
Pisoq aallartippoq Folketingimit amerikamiut nassuiaanissaat piumasarineqaraluarmat. Taamaattorli qallunaat naalakkersuisuinit amerikamiut aallartitaqarfiat ilisimatinneqarsimavoq qallunaat naalakkersuisuisa kissaatiginngikkaat akissuteqartoqassasoq, pisullu piuigorneqarnissaa neriuutigineqartoq.
Tamatuma kingorna amerikamiut aallartitaat Washingtonimut nalunaarusiamini qallunaat piumasaat issuarlugu allappoq. Tassalu taakku allakkat maanna Wikileaksimi atuarneqarsinnaapput.
Maannalu tassa qallunaat qanoq iliuuseqarnissaat Nunatsinnit utaqqimaarneqarpoq qanoq iliuuseqarnissaq tulleq pisinnagu.
- Qanoq iliuuseqarnissaq tulleq pissagunarpoq, Naalakkersuisut siulittaasuata, Kuupik Kleistip qallunaat ministeriunerat aamma nunanut allanut ministeriat tallimanngorpat ataatsimeeqatigereerpagit, Inuuteq Holm Olsen oqarpoq, nangillunilu:
- Ataatsimeeqatigiinnermi pingaarnerut eqqartorneqassapput paasissutissat saqqummertut kingulliit qanoq isigineqarnersut.
Naalakkersuisut siulittaasuata Kuupik Kleistip qallunaat ministeriunerat, Lars Løkke Rasmussen, tallimanngorpat ullaap tungaa ataatsimeeqatigissavaa, ualikkullu nunanut allanut ministeri, Lene Espersen ataatsimeeqatigissallugu.
