Misissuinerit kingulliit anorersuarnera pissutigalugu kinguaattoortut

Nuummi silarlunnera pissutigalugu timmisartumik angallassisoqanngilaq, taamaattumik coronavirusimik misissuinerit kingulliit arfininngornermi pissarsiarineqarsimanngitsut, Ineqarnermut Attaveqaqatigiinnermullu Naalakkersuisoq, Karl Frederik Danielsen tusagassiortunik katersuutsitsinermi taama oqarpoq.

Kisitsisit kingulliit naapertorlugit inuit katillugit qulit coronavirusimik tunillatsissimapput marluk peqqissereersut. Coronavirusi pissutigalugu napparsimmavimmut suli unittoqarsimanngitsoq, Nunatta nakorsaarnera, Henrik L. Hansen oqarpoq.

Misissukkat amerlanerit Nuummeersuupput, sinerissamiillu misissukkanik aamma tigusaqartoqareersoq, nakorsaaneq oqarpoq.

Ilulissani misissukkat 31-upput, Aasianni 24-t, Sisimiuni 23-t, kujataani 22-t Tunumiillu misissukkat suli amigaatigineqartut utaqqineqarlutik.

Timmisartoq misissukkanik angallassisoq Danmarkimut ingerlaarpoq, taamaattumik sapaammi annerusumik paasissutissiisoqarnerussaaq, nunatta nakorsaanera, Henrik L. Hansen oqarpoq. 

Nunatta ilaani angerlarsimaffinni perulluliornerit tallimanngornerit allat assigikannerlugit politiinit ulapputigineqarsimapput.

Angerlarsimaffinni perulluliornerit tallimanngornermiit ualikkut sisamanit maannamut 23-t nalunaarsorneqarsimapput. Nuummi perulluliornerit arfiniliullutik, politimesteri, Bjørn Tegner Bay oqarpoq.

- Politiit tallimanngornerup unnuaani ulapingaatsiarsimapput, festertoqarnerani perulluliortoqarlunilu inuppassuit katersuuttarsimapput, taamaattumik eqqarsarluarnissaq pingaaruteqarpoq, Bjørn Tegner Bay taama kaammattuuteqarpoq.