Misissuineq: Qallunaat inuusuttut kalaallit pillugit pigiliutiinnakkaminnik isumaqartarput
Danmarkimi ilinniarnertuunngorniat pingajorarterutaannat misigipput Kalaallit Nunaat pillugu ilinniartitaanikuullutik. Taakkunanilu amerlasuut atornerluineq kalaallinut attuumassuteqartittarpaat.
Epinionip Ilinniartitaanermut Ministeriaqarfik sinnerlugu misissuinerani paasisat tamakkuupput, Politiken taama allappoq.
9. klasseni atuartuniit 3. g-ertut misissuinermi peqataatinneqarnermikkut apersorneqarmata Kalaallit Nunaat pillugu isummeqquneqarput. Apersorneqartut affaasa missaat oqaatsit; pikatak aamma atornerluisoq kalaallinut attuumassuteqartikkajunnerartarpaat. 12 procentiilu kalaallinik ataatsimooqateqarluartarnerarput ataatsimooqateqartorujussuusarnerarlutilluunniit, massa 40 procentii ataatsimooqateqalaartarnerartut ataatsimooqateqanngiivittarnerartulluunniit.
- Kisitsisit saqqummiussat ilimagisannit qaffasinnerupput. Kalaallit Nunaat inuuniarnikkut ajornartorsiortunik inoqarpoq, kalaallilli ingerlalluartut kalaallit pillugit ilisimasaqanngitsunik naapitaqartarnerat akulikippallaarujussuarpoq, IA-p folketingimi ilaasortaatitaa aamma Kalaallit Nunaat pillugu ataatsimiititaliami siulittaasumut tullersortaasoq Aaja Chemnitz Larsen Politikenimut oqarpoq.