Misissueqqissaartarfik Århusimiit Nuummut nooqqugaat

Nannup neqaa trikininik toqunartunillu allanik akulik nerigaanni qanoq inunnut kinguneqarsinnaava? Avatangiisit mingutsinneqarsimanerisa kingunerisaanik kalaallit kinguaassiorsinnaajunnarsinnaappat?

Issittumi avatangiisinik misissueqqissaartarfimmi ilisimatuut apeqqutit taamaattut akissutisiniarlugit misissuisarput. Misissuisarnerit suli pitsaanerulernissaat neriuutigalugu misissueqqissaartarfiup Århusimiit Nuummut nuunneqarnissaa misissueqqissaartarfimmi pisortap suliniutigaa.

- Misissuisarfik Nuummut nuunneqassappat pissutit pitsannguallassapput, Issittumi misissueqqissaartarfimmi Århusimiittumi pisortaq Jens C. Hansen oqarpoq.

Taanna ukiut marluk qaangiuppata utoqqalinini pissutigalugu sulinnaartussaavoq suliunnaannginnerminilu nunatsinni avatangiisit mingutsinneqarnerisa kingunerisaanik inuit peqqissusaasa eqqorneqartarnerinik misissueqqissaartarfiup Nuummut nuunneqarnissaa suliniutigaa. Pinngortitaleriffiup eqqaani Ilimmarfissap ilaatut sananeqarnissaa anguniarneqarpoq siornatigumullu naleqqiullugu tassunga nuunneqassaguni suliniutit erseqqinnerusumik paasissutissiissutigineqartarnissaat anguniagaavoq.

Tromsømi Sankt Petersborgimilu ilisimatuut issittumi pissutsinik assigiinngitsunik misissuinermi suleqatigineqarput.

- Ulluinnarni inuunitsinni avatangiisitsinnit qanoq sunnertittartiginersugut misissuinitsinni paasiniarsarivarput. Assersuutigalugu paaserusuppagut sooq kinguaassisinnaajunnaartoqartarnersoq, timip nappaatinut akiuussutissaarukkiartortarnera sumit peqquteqartarnersoq kiisalu sukkornermik napparsimaleriartortarnerit qanoq issittumi pinngoriartortarnersut, Jens C. Hansen oqarpoq.

Issittumi avatangiisinik misissueqqissaartarfimmi sulisut Peqqissutsimut naalakkersuisoq Asii Chemnitz Narup ataatsimeeqatigisimavaat.

Jens C. Hansenillu isumaa naapertorlugu misissueqqissaartarfiup Nuummut nuunneqarnissaanik siunnersuut Asii Chemnitz Narupimit orniginartinneqarpoq.