Misissueqqissaartarfik isumalluarfiuvoq

Nuummi aatsitassanut misissueqqissaartarfeqalernera nunatsinnut iluaqutaallualernissaa aatsitassarsioqatigiiffiup Nuna Mineralsip pisortaata Ole Christiansenip qularinngilaa.

Ujaqqat aasaanerani misissugassatut katersamik akuisa suunerinik misissoqqissaakkat inerneri, siornatigut aatsaat aappaaguani akissutissarsisartakkatik, maanna sapaatip-akunnerini marluinnarni utaqqisalissavaat.

-Uani nutaaliornitsinni uumarinerujussuarmik pilersinnaanerput isumaqarpoq, suli aasaanerani analyset takkussuuttalernissaannik, taamaasiorluta asimi sulinerput peqarfinnut pissanganarnerusunut sangutissinnaassallugu, Ole Christiansen aallartippoq. Tamanna ajunnginnerusunik inerneqarsinnaajumaartoq qularinngilaa.

Canadamiut aatsitassarsiorfiutaata ujaqqanik aserorterivik ingerlataraat. Kalaallimmi sulisorineqalissanerlutik.

- Isumaqatigiinnikuuvugut soorunami kalaallit aamma sulisutut akuutinneqassasut, taamatullu aamma pisariaqartitsineq naapertorlugu ilinniartinneqassasut. Aserorterivik maanimiunit aasaq ingerlanneqarpoq, soorluttaaq maanimiut suleqatigalugit siornatigut ingerlanneqartarsimasoq. Kisianni laboratoriartaani suliassat siunissami maanimiunit aamma ingerlanneqalernissaat naatsorsuutigaarput, pisortaq oqarpoq.

Misissuisarfittaaq nunatsinnut tamarmut iluaqutaalissangatinneqarpoq.

- Uagutsinnuinnaanngitsoq, nunarpulli tamaat ikiorsissavaa. Aatsitassanik peqarfinnik nassaarniarnermi uumarinerusumik suleriaaseqalerutta, aamma nassaarineqartartut nutaat uumarinerusumik takkussuutilissapput, qalluinermik ingerlanniakkagut taamaalillutik ukiuni tulliuttuni amerliartornerulissallutik. NunaMineralsip pisortaa Ole Christiansen oqarpoq. Canadamiut aatsitassat sunik akoqarneranik misissuisarfiutaat, nunani tamalaarpassuarni immikkoortortaqartoq, Activation Laboratories, nunatsinni immikkoortortamik aggustimi aallartitsisuuvoq. Misissuisarfittaaq taanna katillugit 5 millioni koruuningajannik naleqarpoq Nuna Mineralsip saniatigut aningaasaliisuullutik Nuup kommunea Grønlandsbankillu inuussutissarsiutinik ineriartortitsinermut aningaasaateqarfia. Illorsuup marlunnut avissimasup allaffissuartaa suli atulinngilaq.