Misileraataasumik katsorsaasarneq periarfissaalerpoq
Aaqqissuussineq erniinnaartumik atuutilerpoq, taamaalilluni kræfteqartut allallu ajorunnaarsinneqarsinnaanngitsumik nappaateqartut misileraataasumik katsorsarneqarnissaminnik qinnuteqarsinnaalerput. Emilie Olsen Atassummeersoq aperaarput, taamatut katsorsarneqarsinnaalerneq kræfteqartunut qanoq kinguneqarsinnaanersoq.
- Inuup nammineerluni aalajangersinnaavaa taamatut katsorsartikkusunnerluni imaluunniit katsorsartikkusunnginnerluni.
Taamaattumik misileraataasumik katsorsarneqarsinnaaneq periarfissamik ammaassineruvoq, tassa kræftimik nappaatillit allallu katsorsarneqarsinnaanngitsumik nappaatillit maanna periarfissinneqarput, Danmarkimi katsorsartissinnaanngorlutik.
- Taamatut katsorsartissinnaaneq aningaasaqarnermut ataatsimiititaliamit itigartinneqaraluarpoq. Taamaattorli naalakkersuisut Inatsisartunut qinnuteqarnissaminnut pisinnaatitaaffeqarput. Inatsisartunilu amerlanerussuteqartut tamanna aalajangiuppaat.
- Soorunami qanorpiaq akeqassanersoq oqaatigineqarsinnanngikaluartoq misissuisoqassaaq. Kisianni kræftimik nappaatilinnik katsorsarneqarsinnaanngitsunik peqartilluta periarfissaq taanna pingitsoorsinnaanngilarput.
Taama oqarpoq Emilie Olsen, Atassut. Misileraataasumik katsorsarneqarsinnaaneq pillugu isumaqatigiissut Inatsisartuni partiit tamarmik, Demokraatit kisimik pinnatik akuersissutigaat.