MIPI-p misissuineranit nalunaarusiaq saqqummerpoq

Nunatsinni meeqqat aqqaniliugaangata ataaseq piitsuuissutut, pingasuugaangatalu ataaseq ikiorsiissutinik pisartagaqartutut inuulluni peroriartortarpoq, MIPI - Meeqqat Inuusuttullu Pillugit Ilisimasaqarfiup misissuinerata nalunaarusiarineqarnerata ullaap tungaani saqqummersup tamanna ersersippaa.

Kalaallit Nunaanni meeqqat 9 procentii - meeqqat aqqaniliugaanga ataaseq atugarissaarani inuusarpoq meeqqallu 39 procentii - meeqqat pingajorarterutaat pisariaqavissuinnarnut ikiorsiissutinik pisartagaqartutut piitsutut inuupput.

Aamma meeqqat 4 procentii - meeqqat 25-ugaangata ataaseq piitsuungaatsiartutut inuusartoq,

Meeqqat piitsuunerat-nik taallugu saqqummersitami atuarneqarsinnaavoq.

Misissuinermi illoqutigiit 8.082-it, kommunini 17-ineersut Kalaallit Nunaanni Naatsorsueqqissaartarfiup kisitsisaataaniittut aallaavigineqarput.

Inoqutigiit meerartallit isertitaat kisitsisinngorlugit paasissutissat atorlugit misissueqqissaarneqarsimavoq. Saqqummersitarlu Kalaallit Nunaanni meeqqat inuuniarnerat pillugu saqqummersut immikkoortut aapparaat. Saqqummersitat tullerissavaat Kalaallit Nunaanni meeqqat inuuniarnerat.

Nalunaarusiap ersersippaa Kalaallit Nunaanni meeqqat piitsuunerat missingersuutit pingasut atorlugit, tassaasut 1) Piitsuunermut eqqaanartoq.

2) Pisariaqavissuinnarnut ikiorsiissutinik pisartagaqarluni piitsuuneq aammalu 3) Piitsuunertut paasineqarsinnaasoq. Nalunaarusiap allaaserinnittua tassaavoq Innuttaasut peqqissusaannik cand.scient i folkesundhed aammalu Københavnip Universitetiani ilisimatusartoq Christina Schnohr.

Misissuinermi piitsutut inuusut tassaanerunerarneqarput, meerartallit 25-it inorlugit ukiulinnik inersimasortallit, meerartallit ataasiinnarmik pilersuisullit, meerartarpassuallit, nunaqarfimmiuusut kiisalu inersimasortaat nunatsinni inunngorsimasuusut.

Misissuinermi paasissutissat inoqutigiit meerartallit 0-17-inik ukiulinnik ukioq 2004-mi atorneqarput.

Unnugu radioavisimi misissuinermut tunngasut nangissavagut.