MIPI -p Kalaallit Nunaanni inuppassuit attorpai
Angajoqqaat pissakilliortut piitsullu pillugit misissuinerup inerneri saqqummiunneqarmata kalaallit nunaanni amerlaqisut attortipput. Radioavisimut sianertut allattullu pisarnermik amerlaneroqaat kiisalu nittartakkat assigiinngitsut oqallittarfiillu aamma isummersorfineqarput.
Inussuk sinnerlugu siulittaasoq Elisabeth Johansen oqarpoq 117-ssaannik ataatsimiititaliamik misissuisussamik pilersitsiniarsarinata atugarliortortagut ikiorniarlugit timitaliisariaqalersugut. Meeqqat Inuusuttullu pillugit Ilisimasaqarfiup Kalaallit Nunaanni piitsut pillugit saqqummiussai misissoqqaarniarlugit Tommy Marø oqarmat Elisabeth Johansen taama oqarpoq. Qasigiannguani naalaartartut ilaat aterminik taaseqqusinngitsoq oqarpoq angajoqqaat pissakilliortut nunaqarfinniinnaq takussaanngitsut aammali illoqarfinni siumugassaajuartut. -Piitsuussuseq pissakilliornerlu aningorniartariaqarput, taama Sermitsitamut oqarput Inuit Ataqatigiit siulersuisuuneri ataatsimeeqqammersut. Inuit Ataqatigiit siunnersuutigaat inatsisartut ataatsimiilerpata Atugartuussuseq pillugu isumasioqatigiinnik pilersitsisoqartariaqartoq taakkulu paasissutissat pigineqareersut sakkugalugit qaqilereqqissaartariaqartut iliuusissanillu tikkuussillutik. Atassutip oqallittarfiani aamma pissakilliortut piitsullu oqallisaapput. Oqalliseqataasut ilaata Karl Petersenip pissakilliortunik ikiuiniarlutik politikerit neriorsuisartut ujartorpai. –Upperumannginneruvorlu pissakilliortunillu ataqqinninnginnerulluni naalakkersuisut pissakilliortut pillugit saqqummiussanik upperinnikkumannginnerat, Karl Petersen aamma allappoq. Ilulissani, naalaartartut ilaata oqaatigaa pissakilliornermut pissutaaqataasoq pisortat ikiorsiissutigisartagaasa ikippallaarnerat ilaatigut taamaallaat sapaatip akunneranut inuussutissatut 150 koruuniinnaat suliffissaaleqisunut tunniunneqartarmata. Kattusseqatigiit partiiat sinnerlugu Anton Frederiksen radioavisimut oqarpoq naalakkersuinermik suliallit ilaasa nalugunaraat meeraqarmat perlilerlutik innartariaqartartunik. Anton Frederiksen oqarpoq piniartut ilaasa pissakilliornerannut aamma pissutaaqataasoq piniakkanik ingasattumik killilersuineq. Anton Frederiksenip nungusaataanngitsumik piniakkanik timmissanillu atorluaanerunissaq siunertaralugu inatsisartoqatini suleqatiserai.
