MIO-p suliniut nutaaq aallartippaa

Suliniut tamanna ukiamut novembarip 20-ata tungaanut ingerlanneqassaaq. Novembarip 20-at tassaavoq, Naalagaaffiit peqatigiit Meeqqat pillugit Isumaqatigiissutaasa atuutilerneranit, ukiunik 25-nngortorsiornernik ullorititaq.

Ullup taassuma nalliussineqarnissaata tungaanut, meeqqat atugarissaanngitsut meeqqallu psinnaatitaaffimminnik naamassinniffigineqarsimanngitsut, 5.000-it missaanniittut sullinneqassasut, MIO tusagassiutinut nalunaarumminni allappoq.

Danmarkimi Inunnik Isumaginninnermik misissuinermi Instituttip, paasiniaanerani meeqqat 5.000-it missaanniittut pisinnaatitaaffiisa Nunatsinnit atuutsinneqannginneri paasinarsivoq, inuttut atugaat ajorluinnartut sumiginnagaasullu nalunaarusiami allaaserineqarlutik. Meeqqat angajoqqaaminnit aammalumi oqartussanit suminginnarneqartartut nalunaarusiani arlalinni aamma aallaaserineqartarpoq.

MIO-p suliniuteqarnerani siunertaavoq, meeqqat tamarluinnarmik pisinnaatitaaffeqarnerminnik ilisimasaqalernissaat aamma angajoqqaat politikerillumi akisussaaffimminnik ilisimasaqarnerulernissaat anguniarneqarluni. Taamaaliornikkut meeqqat pitsaanerusumik inuuneqalernissaat anguniarneqarluni.

Meeqqat inuuniarnermikkut ilugersunartoriortut 5.000-it puigorneqannginnissat anguniarlugu, MIO-p Facebook atorlugu like's-inik katersiniarpoq, tamannalu novembarip 20-ata tungaanut ingerlanneqassalluni. Ullorlu taanna nalliuppat, like's-it qanoq amerlatiginerannik uppernarsaat, Naalakkersuisunut tunniunneqassaaq.