Nalliuttorsiornermut atatillugu MIO atuakkamik saqqummersitsisoq
Ilaatigut meeqqanut atuakkiaq, 'Tuku aamma Mala' Meeqqat Inuusuttullu Oqaloqatigiittarfiannit, MIO-mit aamma Kalaallit Nunaanni Naligiissitaanissamut Siunnersuisoqatigiinnit saqqummersinneqassalluni.
Atuakkiami qitiutinneqarpoq naligiissitaaneq meeqqallu pisinnaatitaaffii meeqqat isaannit isigalugu.
Naligiissitaanermut Siunnersuisoqatigiit MIO-lu isumaqarput, meeqqat meeqqatut pisinnaatitaaffitik pillugit ilisimasaqarnerulertariaqartut aamma naligiissitaaneq qanoq pisariaqartiginersoq meeqqanit ilisimasaqarfigineqarnerulernissaa anguniarneqarluni.
Atuakkiap meeqqat ataasiakkaat eqqarsalersinniartussaassavai periarfissiillunilu ikinngutigiinnerup naleqarneranik taamatullu peqatigiilluni oqaluuserinnissinnaanissamik naak meeqqat assigiinngissinnaasaraluartut, tusagassiutinut nalunaarummi MIO ilaatigut taama allappoq.
- Naligiissitaaneq tassaavoq, meeqqat ataasiakkaat namminneq iliuuseqarnissaannut ineriartornissaannillu periarfissinnissaat. Qangatut eqqarsarluni nukappiaqqat niviarsiaqqallu susinnaanerannik, susussaanerannik qanorlu iliortussaanerannik eqqarsaatinik killilersorneqaratik, Kalaallit Nunaanni Naligiissitaanissamut Siunnersuisoqatigiinni siulittaasuugallartoq, Josef Therkelsen allappoq imalu nangilluni.
- Ilumoorluni oqartoqarsinnaanngilaq, niviarsiaqqat nukappiaqqallu qanoq ittuusussaasut, Josef Therkelsen allappoq.
Meeqqanut atuakkiami, 'Tuku aamma Mala'-mi naggasiunneqarput, qulequttat inersimasunit meeqqanillu oqaluuserineqarsinnaasut.
