Ministeriunerup ukiortaami oqalugiaataa: Meeqqat atugarliortut amerlanerit angerlarsimaffiup avataanut inissinneqartassapput

Ministeriuneq Mette Frederiksen ukiortaami nalunaaqutaq marlunut oqalugiarpoq.

Mette Frederiksenip meeqqat salliutinniarlugit ukiup aappaa avillugu matuma siorna neriorsuutigaa, neriorsuullu taanna ukiortaami oqalugiaqqaarnermini malitseqartippaa.

Qinersisartut Mette Frederiksenip piffissaq ministeriuneruffia meeqqat inuusuttullu inuiaqatigiinni qanoq angusaqarnissaat tunngavigalugu nalilersinnaassavaat.

- Angajoqqaat ilaat ullumi periarfissinneqarpallaartarput. Immaqa ajunnginnerpaamik siunertaqartoqarluni. Aqqaneq-marlunnilli ukiullit angerlarsimaffiup avataanut inissinneqarunik ukiuni aqqanilinni atugarliorsimagajuttarput. Taamaammat paqumisukkunnaartariaqarpugut, Mette Frederiksen oqarpoq.

Siusinnerusukkut iliuuseqartoqartassaaq

Inuuniarnikkut ajornartorsiutit kinguaariinnut tullernut kingornunneqartarneri Danmarkimi ilaqutariinnut minnerunngitsumillu meeqqanut eqquisartut aaqqiiffigineqarniartaraluartut suli iluatsinngitsoq, ministeriuneq isumaqarpoq.

Meeqqat angajoqqaaminniitinniarneqarpallaartartut atuarfinnilu ilikkagassatut anguniakkat sanngiinnerpaanut eqquisartut, taakkualu ajornartorsiutit kingorngunneqartarnerinut pissutaasut Mette Frederiksen siusinnerusukkut oqarpoq.

Siusinnerusukkut iliuuseqartoqartariaqartartoq angerlarsimaffiullu avataanut ataavartumik inissiisoqartariaqartartoq ministeriuneq isumaqarpoq.

- Tamanit isumaqatigineqarnaviarnanga nalunngilara. Pinaveersaartitsinerusariaqartugut ilaqutariillu paarilluarnerusariaqarigut ilaat oqassapput. Taamaaliussaagut, tamannali naammannavianngilaq. Meeqqat paatsuugassaanngitsumik illertariaqarpagut, Mette Frederiksen oqarpoq.

    /ritzau/