USA-mi præsidentinngulersup Donald Trumpip Kalaallit Nunaannik soqutiginninneruleriartornini pillugu oqaatsiminik ilumoorussinngitsutut isumaqassalluni pissutissaqanngilaq.

Ministeriuneq Mette Frederiksen(S) Donald Trumpimik oqarasuaatikkut minutsini 45-ni oqaloqateqareerluni taama oqarpoq.

Ministeriuneq Donald Trumpip Kalaallit Nunaannik piginnittuulerusunnera pillugu TV2 Newsimit aperineqarpoq:

- Kalaallit Nunaat pillugu soqutiginnittoqartorujussuusoq qularutissaanngilaq, Mette Frederiksen akivoq.

Tassani Donald Trumpip oqaasiisa isumaanik ilungersunartorsiutiginnginnerulernerminik, taassuminnga oqaloqatiginninnini kinguneqanngitsoq, taanna naqissusiivoq.

- Kalaallit Nunaannik soqutiginnittoqarnerup annikillisimanissaannut maannamut tusariikkatta ullumilu oqaloqatigiinnerput aallaavigalugu pissutissaqanngilaq, Mette Frederiksen oqarpoq.

Nunalli killiit naalagaaffeqatigiillu sillimaniarnermut politikkiisa qajannarsisimanerannut ernummatissaqartoq Mette Frederiksenip ilanngullugu oqaatigaa:

- Kalaallit, soorlu aamma inuiaat allat nunani allani aamma taamaattut siunissartik namminneq aalajangiffigisussaagaat kikkunnit tamanit, , aamma amerikamiunit, ataqqineqassasoq neriuutigaara, Mette Frederiksen TV2-mut oqarpoq.

Nunanut allanut tunngasuni politikkikkut ajornartoortoqalerneranut pissutissaqanngitsoq, nunanut allanut tunngasunut ministerip Lars Løkke Rasmussenip oqaatigaa.

Mette Frederiksen TV2 Newsimit taava aperineqarpoq tassunga atatillugu isumaqataanersoq, Lars Løkke Rasmussenilli oqaasiinut toqqaannartumik akissuteqarnani.

Taarsiullugu ima oqarpoq:

- Pissutsit ilungersunarput. Tamatta tamanna takusinnaavarput, ministeriuneq oqarpoq.