Mette Frederiksenip Trumpimik oqaloqateqarnera politikerip nunatsinneersup nuannaarutigigaa
"Aalajangiisartoqatigiinnut ilisimatitsineq".
Ministeriunerup Mette Frederiksenip (S) Folketingip nunanut allanut tunngasuni aalajangiisartoqatigiivini nunatta nalunaaqutaa naapertorlugu ullaaq manna qulingiluanut ataatsimiinnissaanni oqaluuserisassaat taama qulequtaqarpoq.
Mette Frederiksen USA-mi præsidentinngortussamik Donald Trumpimik, Kalaallit Nunaannik aqutsilerusullunilu piginnikkusuttumik oqarasuaatikkut minutsini 45-ni ippassaq pingasunngornermi oqaloqateqarpoq.
Mette Frederiksen Trumpimik oqaloqateqareerami tusagassiortunit apersorneqarpoq:
- Kalaallit, soorlu aamma inuiaat allat nunani allani aamma taamaattut siunissartik namminneq aalajangiffigisussaagaat kikkunnit tamanit, aamma amerikamiunit, ataqqineqassasoq neriuutigaara, Mette Frederiksen TV2-mut oqarpoq.
Aaja Chemnitzip (IA), nunanut allanut tunngasuni aalajangiisartoqatigiinni ilaasortaasuusup, Mette Frederiksenimit maannamut tusakkani nuannaarutigai.
- Danmarkimi naalakkersuisut anguniagaqarluarput. Kalaallit Nunaanni aalajangiisoqarnissaa siunniunneqarpoq, tamannalu 100 procentimik tapersersorpara, Aaja Chemnitz oqarpoq.
