Ministeriuneq qinersereernermi siammasissumik naalakkersuisoqatigiiliorusuttoq
![](/sites/default/files/styles/image_934x467/public/article_images/20221101-095255-b-7181x4787ma.jpg?itok=xLWObtyI)
Ministeriuneq Mette Frederiksen, Danmarkimi partiit 14-it siulittaasuisa akornanni siullersaalluni qinersiartorpoq.
Qinersereernerup kingorna siammasissumik naalakkersuisoqatigiiliornissaq orniginartinnerullugu oqaatigeqqippaa:
- Siammasissumik suleqatigiittoqarsinnaanera neriuutigaara, naalakkersuisoqatigiit suleqatigiissut, Mette Frederiksen, Værløsemi Hareskovhallenip saavani tusagassiortunut ilaatigut oqarpoq.
Mette Frederiksen, uini Bo Tengberg peqatigalugu qinersiartorpoq . Taanna maanna Aalborgiliassaaq, Socialdemokratillu piffissaq kingulleq atorlugu sukataassasut oqaatigalugu.
- Piffissaq kingulleq tikillugu sukataassaagut. Qinersineq una pissanganarluinnarpoq, qineqqusaarluartoqarsimaneralu eqqaallugu.
Naak Socialdemokratit inunnik isumasiuinerit naapertorlugit partiini annerpaanngussagunaraluartoq, partiip ukiuni 120-ni oqaluttuarisaanerani aatsaat taama angusaqarnerlutsigisinnaavoq.
Socialdemokratilli 2019-imili naalakkersuisuutitaqarsimasut, Folketingimi partiit akornanni qinersinerup kingorna suli sunniuteqarnerpaassagunarput.
Partiip ataatsip ikinnerussuteqarluni naalakkersuisuutitaqarnissaa Socialdemokratit ukiualunni attassimavaat, partiilli qiterliit peqatigalugit siammasissumik naalakkersuisoqatigiiliorsinnaanissaq maanna kissaatigineqarluni.
Partiit talerperliit ministeriunertut piukkussatik Jakob Ellemann-Jensen, Venstremeersoq, Søren Pape Poulsenilu, Det konservative Folkepartimeersoq, Mette Frederiksenimik suleqatersinnaanertik mattutiivinnikuuaat.
AAMMA ATUARUK Savalimmiuni talerperliit saamerliillu ilaasortaatitaqalersut