Ministerit tikeraartut

Nunarput danskit ministeriinit sapaatit akunnerini makkunani tikeraarneqarusuttorujussuuvoq.

Danskit nunanut allanut ministeriat, Per Stig Møller, avatangiisinullu ministeri, Connie Hedegaard, ulluni makkunani nunatsinniipput. Taakku Danmarkimut utersimatsiaannartullu, suliffissaqartitsinermut ministeri, Claus Hjort Frederiksen, ataasinngorpat tikissaaq. Taanna ullut tallimat ingerlanerini Ilulissaniillunilu Nuummiissaaq.

Nunarput sulinermi sullivinnilu isumannaallisaanermut inatsimmik ukioq manna aallarnerfigalugu peqalerpoq, inatsillu nutaaq pissutigalugu, Claus Hjort Frederiksen tusarniaajutigaluni ataatsimiigiarpoq, sullivinnik nakkutilliisoqarfik Arbejdsmiljøråd-ilu ataatsimeeqatigissallugit.

Suliffeqarfeqarfiit pillugit nunatta Danmarkillu akornanni isumaqatigiissut tunngavissiisoq atsiorneqassaaq.

Nunatta Danmarkillu akornanni suliffeqarfeqarfiit pitsaanerusumik sunniivigeqatigiinnissaat isumaqatigiissutip qulakkeerniarssarissavaa.

Naalakkersuisunut ilaasortap, Siverth K. Heilmannip, qaaqqusineratigut, Claus Hjort Frederiksen nunatsinnukassaaq. Suliffeqarfiit arlallit tikeeraarnerup nalaani pulaarneqassapput. Royal Greenlandip Ilulissani suliffissua Nuummilu Polar Raajat pulaarneqartussanut ilaapput.