Ministerit marluk naveerneqarput
Danmarkimi naalakkersuisut ministeriinut konservativiusunut ulloq nuannerpallaarunanngilaq.
Tassami ullumikkut Folketingip kukkunersiuisui uparuaanerminnut atatillugu naveersipput.
Angallannermut ministeri konservativiusoq Flemming Hansen kukkunersiuisunit naveerneqarpoq, Naalagaaffiup kukkunersiuisuisa nalunaarusiaani qimuttuitsut IC4-t Italiamiunit AnsaldoBreda-mit pisiarineqartussat kinguaattoornerat misissoqqissaarneqareersorlu.
Kukkunersiuisut “naammaginartutut isiginngilaat” Italiamiut tunniussinissaminnut pilersaarutaat DSB-mit tutsuiginartutut nalilerneqarsimammata.
Aammattaaq kukkunersiuisunit isornartorsiorneqarpoq ministereqarfiup tunniussinissamut kinguartoornermut atatillugu aningaasatigut iliuuserisimasai, DSB-mut iluaqusiisimasut.