Ministerip meeqqanut kinguaassiutitigut atornerluinemut suliat pisoqalisoorsinnaajunnartikkusukkai

Iliuuserisani peqqarniinnersaat ilaanniippoq. Meeqqanut kinguaassiutitigut atornerluineq pillugu danskit inatsisinik atortitsinermut ministeriat Konservativeninngaanneersoq, Søren Pape Poulsen, taama oqarpoq.
Allattoq Ivik Kristiansen, Karsten Sommer
decembarip 18-at 2016 14:54

Meeqqanut kinguaassiutitigut atornerluineq pillugu inatsisit danskit naalakkersuisuisa maanna sukateriffiginialerpaat, ilaatigut suliat pisoqalisoortissinnaajunnaaniarlugit.

Meeqqat kinguaassiutitigut atornerlunneqarsimasut taamaasillutik eqqartuussivimmut qaquguluunniit suliassanngortitsisinnaalissapput.

Inatsisinillu allannguinissaq tulluartuusoq Søren Pape Poulsen isumaqarpoq.

- Inunnut allanut pinerluutini peqqarniinnersaat ilaanniippoq, Søren Pape Poulsen oqarpoq.

Toqutsineq naalliutsitsinerlu pillugit suliat kisimiillutik ullumi pisoqalisoorsinnaanngillat.

Meeqqalli inersimasullu misigisaminnik ukiorpassuarni eqqarsaatiginninnaveersaarsimasut maanna ikiorneqartariaqartut Søren Pape Poulsen isumaqarpoq.

- Meerarpassuit kinguaassiutitigut atornerlunneqaqqammerlutik oqaasinngortitsisinnaaneq ajorput. Immaqalu ilaasa meeraanerminni misigisatik inersimasunngoreerlutik aatsaat oqaasinngortissinnaavaat, Søren Pape Poulsen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk