Ministeri juullimi pilluaqqusivoq

Illersornissamut ministerip Søren Gadep (V), sakkutuut sorsuffimmiittut qanoq misigisimanissaat nalornisiginngilaa.

- Juulliaqqami unnukkut nuliatik, meeqqatik ilaquttatillu qimallugit sorsuffimmiinnertik qanoq misigisimassaneraat nalunngilara. Tassami uanga 1990-imi Naalagaaffiit Peqatigiit sakkutuuinut ilaallunga Libanonimi juullisiorlunga misilereersimavara, Søren Gade oqarpoq.

- Nalunngilara ukiup taamaalinerani, qaniginerpaasasi maqaasinerpaassagisi, piffissarmi manna eqqaamasanut ileqqutoqqanullu tunngatinneqartunik ulikkaarmat, Søren Gade sakkutuunut juullimi pilluaqqussummini ilaatigut taama allappoq.

Allakkanut juullimi pilluaqqussutinut ilaatinneqarput kulipiina Cross-imeersoq, allassimasoq "For Danmark - Julen 2009" aamma tajaq allassimasoq "From soldier to soldier" - kalaallisut taasinnaasarput "sakkutuumiit sakkutuumut". Tajamit ataatsimit tunineqartumit 100 koruunit isertinneqartut, Sakkutuunut ilaqutaannullu ikiuiniaqatigiiffimmut nakkartinneqartarput. Ikiuiniaqatigiiffimmi tassani sakkutuut ajoquserneqarsimasut aamma sakkutuut toqutaasimasut ilaqutaat ikiorserneqartarput.

Qallunaat sakkutuuinut nunani allani sorsoqataasunut, juullimi inuulluaqqussuteqartut allat tassaapput ministeriuneq Lars Løkke Rasmussen (V), nunanut allanut ministeri Per Stig Møller (K) aamma kunngikkormiut.