Mininnguaq Kleist: Aleqa Hammondimut sukanganerusimasariaqaraluarpugut
Taama nassuiaateqarpoq Naalakkersuisut Siulittaasuata Naalakkersuisoqarfiani, pisortaq Mininnguaq Kleist, Aleqa Hammondip akiligassai paasissutissiissutigereerlugillu.
Naalakkersuisoqarfimmi pisortaaneq Svend Hardenberg peqatigalugu suliaq jannuaarimi tiguaat.
Taamani akissarsiaqarnermut sulisoqarnermullu aqutsisoqarfik ikioqqulluni qinnuteqarpoq Aleqa Hammondip akiligassaasa akilerneqarnissaat piumasarineqarluni taamaaliortoqanngippallu akiliisitsiniartarfimmut ingerlateqqinneqassasut.
Akiligassat qaammatit arfineq pingasut qaangiummata tassalu septemberip qaammataani akilerneqarsimanerat piareersimaffigineqarsimanngilaq.
- Taamani suliaq aallartikkatsigu eqqoriarsinnaasimanngilarput suliap uuma suliarineqarnerani piffissaq taama sivisutigisoq atorneqassasoq. Taamani ilisimasuugutsigu suliaq sapaatip akunnera ataaseq imaluunniit sapaatit akunneri marluk pingasulluunniit ingerlanneranni aaqqinneqarsimasinnaagaluarpoq, Naalakkersuisut Siulittaasuata Naalakkersuisoqarfiani, pisortaq Mininnguaq Kleist taama oqarpoq.
Taassuma oqaluttuaraa ajornartorsiut pilermat, akiligassat allagartaani Aleqa Hammondip kukkuneqarnerarpai kukkuneqarsimappallu Aleqa Hammondip kisimi nassuiarsinnaallugit.
Aamma atuaruk Aleqa pillugu suliaq Namminersorlutik Oqartussanit nassuiaatigineqartoq
Taamaattumik akiligassat allagartai Aleqa Hammondip misissortariaqarsimavai,
tamannali pisimanngilaq.
- Sakkussagut periarfissagullu taamaasa atorpagut, Aleqa Hammond arlaleriarlugu oqarfigisarparput akiligassani akilertariaqarai aamma arlaleriarlugu ataatsimeeqatigisarparput, taamanili inuttaata paasisimasariaqaraluarpaa pingaaruteqartoq akiliinissaminut, Mininnguaq Kleist oqarpoq, - tamattami akiligassaqaraangatta akiliisariaqartaratta aamma suliap naammassinissaa pingaaruteqarmat, Kleist oqarpoq, - kisianni tassa akiligassaq inuttaanit pingaartinneqarsimanngilaq taamaattumik allatut ajornartumik suliaq sivitsorpoq, Mininnguaq Kleist oqarpoq.
Mininnguaq Kleistip erseqqissaatigaa akiligassat jannuaarimi takkummatali allatut iliuuseqartoqarsimasinnaagaluartoq
- Sukanganerusumik iliuuseqarsimasinnaagaluarpugut aamma akiligassaq akiliisitsiniartarfimmut ingerlateqqinneqarsimasinnaagaluarpoq, kisianni taamani jannuaarimi akiligassaq takkummat takorloorsinnaasimanngilarput piffissap taama sivisutigisoq qaangiummat aatsaat akilerneqassasoq,
Naalakkersuisut Siulittaasuata Naalakkersuisoqarfiani, pisortaq Mininnguaq Kleist taama oqarpoq. Taassuma erseqqissaatigaa malittarisassanik nutaanik suliaqartoqartoq akiligassanik akiliisoqartannginnerata pinngitsoortinneqarnissaanik qulakkeerinnittussamik.