Minik Høegh-Dam Siumut, Anthon Frederiksen Naleraq isumaqatigiissummik atsioqatigiittut. Assi: Avannaata Kommunia.

Minik Høegh-Dam Avannaata Kommuniani borgmesterinngortoq

Siumup Naleqqallu Avannaata Kommuniani suleqatigiinnissamik isumaqatigiissutertik atsiorpaat.

Borgmesterinngorniuuttoqareersoq Avannaata Kommuniani najugallit kimit partiinillu kikkunnit ukiuni tullerni sisamni politikkikkut siulersorneqarnissartik paasisinnaanngorpaat.

Siumut Nalerarlu suleqatigiinnissaminnik isumaqatigiissuteqarlutik tusagassiutinut nalunaarput.

- Qineqqusaarnerup nalaani takusimavarput innuttaasut pillugit arlalitsigut assigiinnik siunnerfeqarluta, partiit isumaqatigiittut allapput.

Minik Høegh-Dam-ip borgmesterinngornera, Naleqqamit qinikkap Anthon Frederiksenip KNR-imut uppernarsarpaa.

- Nuanneqaaq. Taava Avannaata Kommuniani toqqissilluta maannakkut ingerlasinnaalerpugut. Aamma qujarusuppunga ukununnga oqaloqatigisatsinnut. Qanorluunniit pisoqaraluarpat ukiut sisamat qinigaasarpugut, taamaasilluni illuatungiliuttuugaluartut suleqatigiiffigisinnaasatsinnut suleqataasinnaapput. Avannaata Kommuniani maannakkut ataatsimoortariaqaleratta, Minik Høegh-Dam KNR-imut oqarpoq.

Borgmesterip tullersotaa siulleq Naleqqameersoq

Taassuma borgmesterip tullersortitaava siulleq Naleqqaminngaanneernerarpaa kinaanersorli maanna taarusunnagu. Avannaata Kommunianut Naleqqamiit isertut tassaapput Anthon Frederiksen aamma Jens Napaattooq.

Naleqqap Atassut, Inuit Ataqatigiit Demokraatillu peqatigalugit Siumup iluminni isumaqatigiinnginnerat sumik peqquteqarnersoq paaseqqaartinnagu isumaqatigiinniarnitik unitsillugit ippassaq nalunarutigaat. Maannali Naleqqap Siumut atsioqatigaa.

KNR-p Demokraatit tunuliaqutaralugit Avannaata Kommunianut ilaasortanngortoq, Lena Ravn Davidsen ullumi attaveqarfigaa. Taanna isumaqatigiinniarsimanani Siumumiillu ippassarli tusagaqarsimanani oqarpoq.

Siumut Nalerarlu Avannaata Kommuniani inissani 17-suni qulinik qinigaatitaqarput.

 

Isummersuutit