Minik Dahl Høegh håndboldligameeqqilerpoq

Kalaallit assammik arsarnermi nunanut allanut unammisartuini anføreri Minik Dahl Høegh ukiup unammiffiusup sinnera TMS Ringstedimi unammisartuussaaq
Minik D. Høegh ukiup affaa unamminngereerluni håndboldligameeqqilerpoq Assi © : Scanpix
Allattoq Noah Mølgaard
novembarip 10-at 2020 13:32

Ukiup affaa assammik arsanngereerluni 35-nik ukiulik Minik Dahl Høegh ima assammik arsarusuummersimatigaaq TMS Ringstedimi pikkorinnerni sungiusaqataasalerluni. Tamanna sioqqullugu Israelimi klubbit ilaannut nuungajappoq.

VM-mut atatillugu unammeratarsinnaanissamut piareersimajumalluni Minik Dahl Høegh isumaqatigiissusiunngikkaluarluni TMS Ringstedimi sungiusaqataasarpoq. Tamannalu tamanut iluaqutaaginnarsimavoq.

- TMS Ringsted unammeqataasalerusunnersunga arlaleriarluni aperisarpoq. Taava kingusinnerpaamik tallimanngormat akereersimaqqullunga periarfissiisoqarpoq. Maannalu tassa isumaqatigiissut atsiorparput, Minik Dahl Høegh KNR-mut oqarpoq.

Assammik arsarusuppoq

TMS Ringsted håndboldligami kingullerpaatut inissisimasoq ukioq unammiffiusoq maanna arlalinnik ajoqusertortaqarpoq. Taamaammat sungiusaasup Christian Dalmosep kissaatigisimavaa Minik Dahl Høeghip ligami unammisartuniilernissaa.

Kalaallit unammisartuisa anføreriat upernaarli klubbinut isumaqatigiissuteqanngilaq unammisaranilu.

- Tamanna timinnut iluaqutaaginnarsimavoq ukiut 15-it kingulliit uninngarpiassanaga ullut tamaasa sungiusartuartarama. Ullulli tamaasa assammik arsarluni sungiusartaleqqinneq saniatigullu nukkassartarneq aallarteqqillugit sakkortuvoq, Minik Dahl Høegh oqarpoq.

TMS Ringsted tullianik unammileruni Danmarkimi pissartaasunut Aalborg Håndboldimut unammissaaq. TMS Ringsted unammerit siulliit qulit naammassinerani kinguleruttortaagallarpoq.

Israelimut nuungajapput

- Ukiup unammiffiusup sinneranut atuuttussamik isumaqatigiissuteqarpugut. Ukiulli kingulliit TMS Ringsted qummut ammullu ingerlavoq, Minik Dahl Høegh oqarpoq.

- Coronap aamma nalorninartumiisippaaga aammalu ukioq unammiffiusoq naappat pissutsit qanoq issanersut naluarput. Naluarput TMS Ringsted ligamiiginnassanersoq imaluunniit 1. divisionimut appariassanersoq. Ukioq unammiffiusoq naalerpat siunissaq aatsaat eqqartorsinnaalissavarput, Minik Dahl Høegh oqarpoq.

Israelimummi nuussamaaleraluarpoq. Isumaqatigiinniarnerilli coronamit akornuserneqarput maannalu aamma Israelip ilarujussua corona pissutigalugu matoqqatinneqarluni.