Mingutsitsisoqassangaluarpat sakkutuut imarsiortut piareersimanngillat
Uulia 20 tonsi. Kalaallit Nunaata imartaani uuliamik mingutsitsisoqarujussuassagaluarpat sakkutuut imarsiortut tassa katersorsinnaasatuaat. Aviisi Berlingske Tidende ullumi taama allaaserisaqarpoq.
Allattoq Louise M. Kleemann
septembarip 19-at 2008 07:02
Mingutsitsisoqarujussuarpalli uulia 20 tonsi pisariaqartitamit annikinnerujussuuvoq, Kangilinnguani Sakkutooqarfimmi premierløjtnant, Trygve Erthmann, taama isumaqarpoq. Taanna avatangiisit pillugit Kangilinnguani paasisimasaqartuuvoq, sinerissamilu alapernaarsuisut Qeqertarsuup Tunuani sukumiisumik ulluni makkunani sungiusarneranni peqataalluni.
-Sussaqannginnermilli ajunnginneruvoq, naammanngippallu atortussanik Danmarkimiit Kalaallit Nunaannukaassisoqartariaqassaaq, ullulli arlallit utaqqineqartariaqassapput. Taamaammat ajunaartoqaqqunagu umiartornermi isumannaallisaaneq nukittorsartariaqarpoq, Trygve Ertmann oqarpoq.
