Mingutsitsinnginnissamut borgmesterit peqataajumapput
Silap kissakkiartuinnarnera pinngitsoortinniarlugu Arnold Schwarzeneggerip namminneq suliniutigisimasatik iluatsissimasut pillugit oqaaseqarpoq
- Innuttaasut ilinniartinnissaat avatangiisimullu mianerinninnissaat pillugit suliniuteqartariaqarpugut, innuttaasut allanngortitseqataasinnaallutik misigissavaat imaanngitsoq naalakkersuisut kisimik utaqqineqassasut. Sila pillugu suliniarnermi iluatsittumik suliniassagutta kikkut tamarmik attuumassuteqartut peqataatittariaqarpavut, Schwarzenegger oqarpoq.
Guvernørip Schwarzeneggerip angerlarsimaffianittaaq suliniutit assigiinngitsut aallartinneqareersimapput. Californiami ukioq 2020 tikitsinnagu 33 procentit tikillugit nukissuutinik mingutsitsinngitsunik taarserneqarsimanissaat siunnerfigineqarpoq.
Schwarzeneggerilu oqarpoq, biilinut orsussatorlutillu innaallagissimoortut ikaarsaariareersimallutik.
- Biilerujussuakka mingutsitsilluinnartut taarseriarsinnarlugit nutaamik avatangiisimut mingutsitsinngitsunik biilitaarpunga tamatumalu saniatigut nalunnguartarfiit seqernup kissaanit pilersorneqartalerput, Arnold Schwarzenegger oqarpoq.
Silap pissusaa pillugu ataatsimeersuarnermi Kommuneqarfik Sermersuup borgmesteria, Asii Chemnitz Naarup borgmestereqaterpassuani aamma najuuffigai oqalugiarfigalugillu.
Borgmesterillu oqallinnerannit Asii Chemnitz Naarup pissarsilluarsimanerarpoq:
- Kommunalbestyrelse aalajangereerpoq, avatangiisinut mingutsaaliuissalluta ineriartortitsissalluta, massakkullu ataatsimeersuarnermi immersorneqarluarlunga misigisimavunga.
Asii Chemnitz Naarup aamma borgmestererpassuarnut ippassaq oqalugiarpoq tamatumalu kingorna borgmestererpassuit eqimattakkaarsinnarlutik silap pissusaa pillugu oqallipput.
- Uanga nammineq apuuppara Kalaallit Nunaat nunarujussuugaluarluni inukitsuararsuusoq taamaattoq pisuussutinik peqarluarpugut soorlu erngup nukiliorfiliornikkut nunanut allanut tuniniaasinnaalluta oqariartuutigaara tamannalu pillugu tusarnaartut qisuariarnerat soqutiginarpoq.
Asii Chemnitz Narup aamma oqarpoq, nunat CO2-mik mingutsitsinerpaat siuttuullutik mingutsitsinnginnaveersaarnissamut suliniaqataasariaqartut.
Borgmestererpassuit ataatsimoorlutik isummersuutaat ataatsimeersuarnermut COP15-mut isumaqatiginniartunut ullumi tunniussipput.
Borgmestererpassuit silap pissusaata allanngoriartornera pillugu ataatsimeersuarnerat Rådhusimi ullumi naammassineqarpoq, Kommuneqarfik Sermersuumilu borgmesteri aqagu Kalaallit Nunaannukarluni aallassaaq.
