Mingutsitsinnginnerusut ujartorneqarput

Qamuteralaat qanoq nipeqartarnersut tamatta nalugunanngilarput. Nipituut ilisarnarluinnartullu.

Tamannali allanngulerunarpoq.

Amerikap avannarliup nunavittaani ilisimatusartoqatigiit, The National Science Foundation, naalisarlugu NSF, maanna unammisitsipput. Qamuteralaat nipikinnerusut, avatangiisinillu mingutsitsinnginnerusut, nanineqarnissaat unammisitsinermi anguniagaavoq.

Suliffeqarfiit qamuteralaliortartut anginerit tamanna arajutsisimanngilaat, unamminermillu malinnaanissartik pingaartilluinnarlugu.

Ingeniørinngorniat iligiiaat sisamat, tamarmik immikkut suliaqassapput, qamuteralallu avatangiisinik mingutsitsinnginnerusoq sananiartussaassallugu.

Ajugaasut sermersuarmukartinneqassapput, qamuteralaliarlu tassani misilerarneqassalluni.

- Kalaallit Nunaanni Sermersuarmi Summit Station-iliartitsinissaq pissanganassaqaaq. Avatangiisit mingutsaaliorneqarnissaat anguniarlugu ilisimatusarnermut peqataanissaminnik ingeniørinngorniat periarfissinneqarput, Tracy Dahl, NSF-imeersoq radioaviisimut oqarpoq.