Mind Your Own Business Nuummi aallartittoq
Suliniummi aallartilersumi eqimattaq siulleq arfineq pingasunik nukappiarartaqassaaq, majillu qaammataata tungaanut eqimattaq nukappiaqqanik inuttaqartoq suliffeqarfeeqqanik aallartisaassalluni.
Mind Your Own Business-ip ingerlaasia, Danmarkimi nukappiaqqanik 500-nit sinneqartunit peqataaffigineqalereersimasumit atorneqartoq, Nuummi atorneqassaaq.
Nuummi aallartinnissaq sioqqullugu nalilersuisoqarsimasoq Nuummi suliniummi aqutsisoq Ivalu Nørreslet Rex KNR-imut oqarpoq.
-Aallartitsinissaq sioqqullugu nalilersuisoqangaatsiarnikuuvoq misissuisoqarlunilu, taakkulu saniatigut maanga Nuummukartoqaqqaarnikuulluni, Ivalu Nørreslet Rex oqarpoq.
Suliniutip ingerlaasia atorlugu Danmarkimi angusarineqartut nunatsinni aamma angusarineqarsinnaanerat suliniummi aqutsisup upperaa. Nukappiaqqammi atuakkersornermi angusarissaarnerulertartut inuiaqatigiinnilu akuunerulertartut misissuinermi paasineqarsimammat.
-Periarfissanik ujartuinerulersarput inuiaqatigiinnilu akulerunnerulersarlutik, Ivalu Nørreslet Rex oqarpoq.
Suliniummi eqimattat tulleriiaarlutik aallartittassapput, suliniullu juuni 2021-ip tungaanut ingerlanneqassalluni.