Mimi Karlsenip atuakkiortut oqaloqatigerusuppai
Atuakkiat immiussatut tusarnaagassanngorlugit saqqummersillugit ineriartortinneqarnissaat Mimi Karlsenip kissaatigaa. Iliuuserineqarsinnaasoq tassaavoq oqaloqatigiinnikkut atuakkiortunik aqqutissiuussinissaq. "Naalakkersuisutut soqutigisaraara atuakkiortut sutigulluunnit saqqummersinniagaat, aammalu oqaloqatigiissutigisinnaavarput atuakkiortut qanoq saqqummersitsiniarnersut, naalakkersuisullu sutigut ikiussinnaanersut" Mimi Karlsen oqarpoq.
Atuakkiortut oqaloqatigalugit periarfissanik nassaartornissaq Mimi Karlsenip kissaatigaa, atuakkiortut atugaasa pitsanngornissaat anguniarlugu. Atuakkat naqitat pisiarineqartarnerat ullumikkut killeqartorujussuuvoq, taamattumillu naqitat sorliit inuit perusunneraat qiviarneqartariaqartoq, Kultureqarnermut naalakkersuisoq isumaqarpoq. Inuusuttut atuagassianik nutaarsiassanillu allaanerusunik pissarsiortarput. Mimi Karlsen isumaqarpoq, atuakkiortup atukkianik allatut saqqummersitsisinnaanera allaanerusumik ineriartortinneqarsinnaasoq, tassalu atuakkiap nipinngorlugu immiullugu tusarnaarneqarsinnaasunngorlugu saqqummersitsisinnaaneq pillugu inuiaqatigiinni oqallittoqartariaqartoq.
Atuakkiortut Peqatigiiffiat sapaatip-akunnerata naanerani katerisimaarput. Kultureqarnermut, Ilinniartitaanermut, Ilisimatusarnermullu Naalakkersuisoqarfiup atukkiortut peqatigiiffiannut aningaasaliissutai 250.000 koruuniusut sunut atorneqarnissaat suliassallu qanoq tulleriaarneqassanersut maannakkut suliarineqarput, siulittaasoq Hans Anthon Lynge oqarpoq.
