Mimi Karlsen: Pilersuisussaaleqinermut spiralilersuisimaneq peqqutaavoq

Siunissami sulisinnaasut ullumimit amerlanerulernavianngitsut ukiuni kingullerni arlaleriarluni nalunaarutigineqartarpoq. Akerlianilli utoqqalisut amerliartuinnarnissaat naatsorsuutigineqartarpoq. Tamanna ilaatigut Aningaasaqarnermut Siunnersuisoqatigiit nalunaarusiornerminni aarlerinartutut nalilertarpaat.

Tamannalu sooq taamaannersoq peqqissutsimut naalakkersuisup maanna akissutissaqartilerpaa.

- Nalunngilarput massakkut utoqqalinersiuteqartussat amerlasoorujussuit. Kisitsillu amigaatigisartagarput tassaavoq, inuusuttut pilersuisussat ikittuararsuummata. Massakkut paasivarput sooq taamaattoqartoq. Tassalu avataaniit aalajangertoqarsimammat spiralilersuinikkut inunngortartut ikilisarneqassasut, Mimi Karlsen KNR-mut oqarpoq.

Affaannanngortut

DR-ip tusarnaagassiaanit kisitsisit naapertorlugit arnat 1966-ip 1970-illu akornanni spiralilerneqartut 4.500-t missaanniipput. Taakkua Kalaallit Nunaanni arnat taamani naartusinnaasut affaraat.

Danskit spiralilersuereerneranni inunngortut 1970-kkunni ikileriarujussuarput. 1967-imi 1.674-it inunngorput, 1974-imilu 638-t inunngorlutik.

- Massakkut paasivarput inuit amerlasoorpassuit inuusuttut massakkut piginngisagut suna peqqutigalugu akornatsinniinngitsut, Mimi Karlsen oqarpoq.