Milliardi koruuningajaat akitsuutitigut isertinniarneqarput

Kisianni Naalakkersuisut siulittaasuata Kuupik Kleistip akileraarutinik qaffaanissaq aqqutissaasorinngilaa:

- Tamatumunnga taarsiullugu akitsuutit arlallit eqqarsaatersorfigaavut, taamaattorli taakkua isertitakinnerusunik eqquissanngillat, naalakkersuisut siulittaasuat Sermitsiaq.AG-mut oqarpoq.

Kuupik Kleistilli akitsuutit sorpiaat eqqarsaatiginerlugit oqaatigerusunngilaa.

Illuatungaatigut Demokraatit aningaasaqarnermut oqaaseqartartuata suut akitsuuserneqarsinnaanerinik isumassaaleqinngilaq:

- Angallatit nuannaariartaatit aallartiffigissallugit pitsaasuussaaq. Uuliamut benziinamullu akitsuutit qaffannissaat aamma aqqutissaalluarpoq, tassami maani Nunatsinni ikummatissat akii appasikannermata. Tamakkua saniatigut nioqqutissat pinngitsoorneqarsinnaasut akitsuusernissaat isumassarsiatsialaassaaq, soorlu skærmit saattukujuut, qarasaasiani pinnguaatit dvd-nullu immiussissutit, Niels Thomsen Sermitsiaq.AG-mut oqarpoq.