Aalajangiinissaq illersuiniaqatigiiffinnit pissanngatigineqartoq

Uuliasiortitseqatigiiffiit assigiinngitsut 13-it Norgep issittortaani Barentip Imartaani uuliasiorlutik qillerisinnaanissaannut Norgemi naalakkersuisut akuersissutinik tunniussinerat, Norgep tunngaviusumik inatsisaanik unioqqutitsinerunersoq, Oslomi eqqartuussiviup maanna aajangiiffigisussanngorpaa.

Avatangiisinik illersuiniaqatigiiffup Greenpeacep aamma Natur og Ungdomip takussutissat kingulliit suliamut atatillugu saqqummiuteqqammerpaat, Norgemilu naalakkersuisut illuatungerineqarlutik.

AAMMA ATUARUK Norgep naalagaaffia uuliasiornermut tunngatillugu eqqartuussivimmut suliassanngortinneqartoq

Avatangiisinik illersuiniaqatigiiffiit naapertorlugit Norgemi naalakkersuisut tunngaviusumik inatsit unioqqutillugu iliuuseqarsimapput, avatangiisimmi minguittuunissaat Norgemi naalakkersuisut suusupagisimavaat, innuttaasullu peqqissuunissaat eqqarsaatiginagu iliuuseqarsimallutik.
Silallu pissusiata allanngoriartornerata akiorniarneqarnissaa pillugu Parisimi isumaqatigiissut unioqqutillugu Norgemi naalakkersuisut aamma iliuuseqartut avatangiisinik illersuiniaqatigiiffiit oqaatigaat.

Norgemi inuit millionit affaasa missaat atsiornernik katersuinermut atsioqataasimapput, taakkumi aamma isumaqarput naalakkersuisut inatsisaatsuliorsimasut.

Eqqartuussivilersuussinermut atatillugu siusinnerpaamik sapaatip-akunneri sisamat qaangiuppata aalajangiisoqarnissaa naatsorsuutigineqartoq, Greenpeacep ilisimatitsissutigaa