Assi: Nils Baum, Bureau for Inatsisartut

Qulaarpaa Mikisualuit initunerusut

Isertitat ikiligaluttuinnarmata aningaasartuutillu amerligaluttuinnarlutik Nunatsinni aningasarsiornerput qunnersuup tungaanut ingerlaarpoq. Taama oqartarneq pikkunalaartoq, politikerit ikittuinnaat ajasoorutigisarpaat, ilungersunartorsiornitsinnillu paasinnillutik.

Nammineerluta illerfiliortassaagut nammineerlutalu pequtsiortassalluta puisit amiinik ammikkanik. Visit Greenland Ilulissanut nuussavarput, taavalu qilalukkat qernertat qaleralittuinnartarmata, amerlanerusunik pisaqarluta. Inatsisartut aningaasanut inatsisissatut siunnersuut ippassaq siullermmeerlugu suliarimmassuk ilaatigut taama oqaluttoqarpoq.

Aningaasaqarnermut naalakkersuisup nunatta aningaasaqarnikkut inissisimanera saqqummiummagu, Siumumit Partii Naleqqamillu mikisualuit initunerupput.

 

Akitsuusiinissaq akerleraat aningaasaqarnerulli oqimaaqatigiissinnissaa piumallugu

Peqassuseq innarlinngikkaluarlugu raajartassat, qaleralittassat, saarullittassat qilaluartassallu amerlanerit Siumumeersup Jens Immanuelsenip Partii Naleqqameersullu Anthon Frederiksenip eqqartorpaat.

Jens Immanuelsen erseqqisaarpaa, nunatta aningasaqarnerata iluarsiniarnissaa Siumup kissaatigimmagu, illuanilli aalisakkanik assigiinngitsunik amerlanerusunik aalisarnermik akitsuusiinissaq akerleralugu.

Kisianni akitsuutinut akerliuneq imaluunniit aningaasaqarnerup oqimaaqatigiissinnissaa pingaarnerunersoq, Jens Immanuelsenip akisinnaanngilaa.

 

Illerfissat qimminullu nerukkaatissat

Partii Naleqqap siunnersuutai tigussaaqaat. Minerunngitsumik pisiassanik eqqussuinermik milllisaanissami.

Anthon Frederiksenip siunnersuutigaa, Nunatsinni nammineq qimminut nerukaasiussasugut, neqinik tunisassiussasugut, illerfinnik sanasassasugut, atisaliussasugut puisillu amiinik pequtsiussasugut.

Kisianni tamakkua pisisartunit pisiarineqarnissaat qanoq ililluni qulakkerneqassanersut oqaatiginngilaa.

Partii Naleraq aamma isumaqarpoq Nunarput naalagaaffiup aningaaserivianik pilersitsissasoq Nunatsinnilu Sillimmasiisarfiuliussasugut.

 

Takornariat Nalerakkormiunit nuannarineqarpallaanngillat

Inuussutissarsiuteqartunut tunngatillugu, umiarsuarnut takornariartaatinut akitsuut qaffasissoq Partii Naleqqap taamaatsiinnarusuppaa.

Anthon Frederiksen nassuiaavoq takornariat umiarsuarlutik nunatsinnut tikittarneri inuiaqatigiinnut nanertuutaasartoq.

- Nunamut niugaangamik pinngortitatsinnik nungullarsaasarput, nersutinut asuli ingerlaaginnartunut immaqalu sanaalukkanik pisiaqalaartunut assersuunneqarsinnaapput, Frederiksen oqarpoq.

 

Qulaarpaa unnugu nalunaaqutaq 19.30, kalaallisut, nalunaaqutarlu 20.30, danskisut, aallatinneqassaaq.

Isummersuutit


 

Pages