Mikisoq Cannes-imi

Nunanit allaneersunit Kalaallit Nunaat pillugu filmiliortoqartareerpoq, soorlu Bille Augustip “Smilla” pillugu suliaani, maannali siullerpaamik kalaallit namminneq aningaasalersuineq isumagalugu, kalaallinik inuttalersugaq kalaallit namminneq filmiliarilerpaat.

Filmiliassamik pilersaaruteqartut ilaat, Mikisoq Lynge, Cannes-mi filmit pillugit katerisimaarnerujussuarmi qanoq aningaasaleeqataasussarsiornersoq aperaarput;

- Ataatsimeeqattaartariaqarpunga, katerisimaarnernut assigiinngitsunut fistertunullu ataasitualaaqataasariaqarpunga, soorunami aallartinnanga, soorlu Nordisk Filmimeersunik Zentropameersunillu ataatsimeeqateqarnissakka pilersaarusioreernikuuakka, tassa taakkua allallu ataatsimeeqatigeqattaarpakka. Filmiliassatta ilitsersuutitassai oqaaserineqartussallu piareerlugit atuartereeraangakkit ataatsimiinnitsinni akileriilluta saqqummeqattaartapugut, isumaqatigiinniarlutalu. Mikisoq Lynge Kalaallit Nunaanneersuunini iluaqutigisinnaaneraa aperigakku oqarpoq, ilaatigut soqutiginarsaatigisinnaagaluarlugu aammali naalliuummernartoqartoq, soorlu takkukkami filmiliortartutut Kalaallit Nunaanneersuunerarmat aaqqissuisulluunniit qarasaasiaanni Kalaallit Nunaat ilanngunneqarsimanngimmat nassuiaassisariaqarsimalluni. Festivalimullu peqataasut soqutiginnilersinniaraanni uppernartumik, pilersaarusiorluakkamik saqqummiussaqarsinnaanngikkaanni taava sumingaanneerneq apeqqutaanngilaq, peqataasummi suut imminnut akilersinnaasutut nalilerneqarsinnaaneri isiginiarnerusarpaat. Filmit pillugit katerisimaarnerujussuaq nunarsuatsinni annersaammat taamalu inoqartigaluni, saqqummiunniagaq pilersaarusiorluarsimanngikkaanni akornannut tammaannartoqariaannaavoq.

Manna angisoorujussuuvoq, nunarsuatsinni filmiliornerup silarsuaani tuniniaasut attaveqaatissarsiortullu pingaarnerit tamarmik maani sinniisuutitaqarput – maannalu uagut aamma sinniisuutitaqarlerpugut, tassa torrak, Mikisoq naggasiivoq.