Michelinip ullorialiuttagai marluk neriniartarfimmut NOMA-mut

Nerisassat pillugit nunarsuaq tamakkerlugu naliliisartut nuimanersaat – Michelinimik taaneqartartut –nerisassiallu pitsaassusii malillugit ulloriannatsitsisartut –Europami neriniartarfiit sorliit ulloriannatsissimanerlugit tamanut maanna saqqummiuppaat.

Neriniartarfillu Danmarkimi marlunnik ulloriannattutuaq tassaavoq, neriniartarfik NOMA, Københavnimi Illu Atlantikumiittoq, kalaallit, islandimiut savalimmiormiullu Illu Atlantikumi aamma aallartitaqarfeqarput.

Nunat Avannarliit nerisassaataannik sassaalliisarnini NOMA-p immikkuullarissutigaa, kalaallit nerisassaataat ilaatigut qitiutillugit. Neriniartarfimmik ingerlatsisuupput igasullammaat Claus Meyer aamma René Redzepi, aalisakkat, neqit naatitallu nunatsinneersut taakku nersualaartuartuuvaat.

- Marlunnik ulloriannannerput pillugu igasuvut marluk oqaluuteqammerpakka, nuannaangaaramillu qanoq iliornissartik naluleraluarpaat, René Redzepi Københavnimi pisut suulluunniit pillugit nittartakkamut ippassaq oqarpoq.

Danmarkimi neriniartarfiit allat arfinillit ataatsimik siornatigut ulloriannannikuupput.