Michael Rosingip Inatsisartunut aalajangersimasumik ilaasortaalernissani qilanaarivaa
Jens B. Frederiksen Inatsisartut upernaakkut ataatsimiinnerat aallarnerfigalugu tunuassaaq, Michael Rosingilu sinniisutut ilaasortanngortinneqassalluni. Ulrik Blidorf Justus Hansenilu sinniisussatut Rosingimit sallersatut inissisimagaluarput, taakkuli assigiinngitsunik peqquteqartumik naaggaarsimapput.
- Inatsisartunut aalajangersimasumik ilaasortaalernissara pissangartippara. Tamannami qangalili sulissutigisarakku, maannalu politikkikkut sulerusussuseerutileraluarlunga periarfissaq takkuppoq, nukikkalu tamaasa atorlugit inatsisartuni sulilissaanga, Rosing neriorsuivoq.
Marsip qaammataani qinersinerup kingorna Demokraatit Naalakkersuisunut ilaasortaasimasunik marlunnik annaasaqarsimapput, Michael Rosingili isumaqanngilaq tamanna partiip sanngiinnerusumik inissisimalernerat aammalu siunissami periarfissaanut sunniuteqassasoq
- Palle Jensilu politikeriupput pikkorissut, aammali inuiaqatigiit marlunnut avissimavaat. Inuit ilaasa Palle Jensiulu nuannaraat, allallu nuannarivallaarnagit. Maannalu inuusuttuulluta marluk Inatsisartunut ilaasortaatitanngorpugut, aamma qaquguugumaarnersoq qinersisoqalerpat Demokraatit angusaqarfiulluartumik qinigaasinnaanissaat angusinnaassallutigu qularutiginngilara, Michael Rosing knr.gl-imut nassuiaavoq.
