Michael Rasmussen Tour de France-imi siuttuujuarpoq

Tour 230707K unnukkut pda eis

Aallarniut:

Sikkilerluni sukkaniunnersuarmi Tour de France-mi sukkanerpaagallartutut, qaqqani sikkilillammassuup Michael Rasmussenip sungaartumik tujuuluaraqarnini ullumi ullut arfineq pingajussaat illersorpaa.

Aap, fjernsyni alassanagu ullumi isiginnaaqqipparput. Taamaalillutami ullut tamaasa ajugaasut ajorsartullu tiguartinnartumik pissangalluta isiginnaarsinnaasarpavut.

Tallivut quleralugit qallunaaq Michael Rasmussen Tølløse-meersoq nunarsuarmi sikkilinik sukkaniunnerit sakkortunersaanni siuarmat isiginnaarparput taamalu nuannaartoralugu ullut tamaasa malinnaaffigisinnaalerparput, naak taanna uatsitulli nalinginnaasumik isikkoqaraluartoq.

Kisianni – tassami kisiannertalerujussuummat – ilami upperissanerlugu upperissannginnerluguluunniit ilaannikkut nalulertaratsigu. Salloqittaasimava? Soorlu arlalinnit taama oqaatiginiarneqartoq. Tamatta illersugarput nukkassaatinik atuisimava? Imaluunniit qallunaat kakkattortarsuat suli upperissanerparput? Ullumikkut Tour de France-mi sukkaniuttoqarnerani nukkassaatinik atuisoqarneranik pasilliineq erseqqeqaaq, tassami franskit ilanngaaserisui siumut nalunaaruteqaqqaaratik sikkilertartoqatigiit sisamat bussii misissuiffigaat.

Neriuutigiinnarniartigu Michael Rasmussenip nukkassaatitorsimanerminik pasilliisut puaatsoortikkumaarai, taamaalilluta Tour de France-mut pissangalluta suli sivisuumik malinnaasinnaaniassagatta.

Juulip 25-anniit Knr-tv-p Tour de France toqqaannartumik aallakaatittalissagaa ilisimatitsissutigisinnaavarput. Taamaattumik ‘Iteqqaannisut’ ullaakkut qulingiluaniit qulinut aallakaatinneqartalissaaq kiisalu ‘SommerSummarum’ pingasunngornermiit tallimanngornerup juulip 27-ata tungaanut ualikkut marluniit aallakaatinneqartassaaq.