Michael Rasmussen sammineqangaatsiartoq

Michael Rasmussen, Danmarkimeersoq, sikkilerluni sukkaniunnerit sakkortunersaanni Tour de France-imi immokkoortukkuutaat ilaanni ippassaq ajugaareersorlu, nunarsuarmi aviisini sammineqangaatsiarpoq.

Tour de France-imi tamakkiisumik ajugaasinnaassava? Aviisit aperipput.

- Michael Rasmussenip Tignes-imut siulliulluni apuunnera takutiinnarpaa Tour de France ukioq manna ammasorujussuusoq. Ajugaasussatut piukkunneqartut ippassaq asuli pisimannginnerput? Michael Rasmussenip ajugaasinnaanissaa ilimagisimannginnerpaat? The New York Times-imeersoq Edward Wyatt aperivoq.

Aviisi Frankrigimeersoq timersornermillu sammisaqartartoq L’Equipe allappoq Michael Rasmussen qaqqasiullaqqissuusoq, Spaniamilu aviisimi El Païs-imi Michael Rasmussenip holdeqataa Pedro Horrillo allaaserinnitsinneqarsimavoq, tujuuluaqqqamillu qaqortumik aappaluttunik toornilinnik arfineq-marloriarluni siornatigut pissarsisarsimasumut Richard Virenque-imut Michael Rasmussen assingutinneqarpoq.

Qaqqanik siulliullutik ituiisut tujuuluaqqamik taassuminnga pissarsisarput, Rasmussenilu Virenque-isorluinnaq maannamut issimavoq, tassa Tour de France-imi tamakkiisumik ajugaasimanngisaannarami.