Michael Rasmussen-ip E-mail-ianut isertoq parnaarunneqarpoq
Cykkilertartup Michael Rasmussenip qarasaasiakkut allagarsiffigisartaagaanut iserneq perulluliorneruvoq annertooq, taamaattumillu angut 30-nik ukiulik pisumut pasineqartoq, politiit misissuineranni parnaarunneqassaaq.
Taamatut isumaqarpoq, Landsretten, angutip 30-nik ukiullip parnarunneqarnissaa ullumi aalajangiiffigaa, aviisi Jyllandsposten allappoq.
Angutip taassuma Michael Rasmussenip qarasaasiakkut allagarsiffigisartagaani paasissutissat aviisimut B.T.-mut tuniniarniarlugit misiliisimavoq.
Pisoq taamatut ittoq aatsaat eqqartuussisutitigut suliarineqarpoq. Allap pigisaanik paasissutissanik allanut tuniniarlugit aningaasannanniarneq, siullermeerutaammat, siunissami aalajangiisarnissanut periuserineqartussanngussaq.