Michael Jacksonip nakorsaa eqqartuussaariaannaavoq

Michael Jacksonip tassanngaannaq juunip ulluisa 25-anni toquneranut atatillugu sumik toqquteqarsimaneranik timaata misissorneqarnerata inerneri ullualunnguit qaangiuppata saqqummiunneqassapput - apeqqullugu akissutissarsineqartussaq tassaavoq - sakkortuunik ulorianartunillu nakorsaatitorsimava?

Michael Jackson toqummalli nakorsaata pissusilersornera eqqumiigineqarsimavoq, allaammi nutaarsiassaqartitsiviup CNN-p oqaluttuaraa nakorsaq nakorsanut maleruaqqusat unioqqutillugit toqussutaasinnaasunik nakorsaasiisimavoq.

Nakorsaq Conrad Murray eqqartuussisulersuunneqariaannaavoq, pasinapiluttumimmi iliuuseqareerpoq. Michael Jackson uummalliorluni napparsimmaviliaanneqarmat sooq ilaanngila? Sooq uummarsaaneq nanginneqaqqusimavaa? Sooq periarfeeruppa ullut arlallit qaangiummata aatsaat imminut tunniulluni?

Dr. Murrayip nakorsiartarfiutaa politiinit misissuiffigineqaqqammerpoq. Nakorsap nakorsaatit ikiaroornartutut sunniuttartut Diprivanit Michael Jacksonimut toqunngilaarnerani tunniuttarsimavai, Diprivanimmi Michael Jacksonip angerlarsimaffiani nassaarineqarput.