Mianersoqqussutit tusaanngitsuusaarneqartarsimapput
Taamatut nipilersortoqannginnerata tungaanut qaammatini aaqqissuussinissami illoqarfimmik aqutsisunut borgmester Adolf Sauerlandimit siuttoqartunut sillimaniarneq pillugu arlalinnik mianersoqqussuteqartarnerit tusaanngitsuusaarneqartarsimapput.
Allaammi ulloq ataaseq sioqqullugu politiit qatserisartullu aalajangersimagaluarput aaqqissuussineq pilersaarutigineqartutut ingerlanneqartariaqanngitsoq. Tamannali kingusinaareersimavoq. Nalliuttorsioqataasut tuusintilippassuit Duisburgimut apuutereersimapput oqartussaasullu allatut ajornartumik angiinnartariaqarsimallutik.
Tamanna arfininngornermi nalunaaqutaq qulingiluanut pivoq - akunnialunnguillu ingerlaneranni Loveparade inuusuttut 20-t toqussutigaat, aviisi Kölner Rundschau taama allappoq.
Isumaqartoqarpoq pisussap Duisburgimut pingaaruteqarnera pissutigalugu mianersoqqusinerit tusaanngitsuusaarneqarsimasut.
- Akisussaasut illoqarfiup nungujartortup qanoq iliuuseqarfiginissaa pillugu isummamit tiguarneqarsimapput, politiit kattuffianni siulittaasoq Rainer Wendt aviisimut Bild-imut oqarpoq.
Alianartumik pisoqarnera pillugu paasiniaaneq Kölnimi politiinit maanna ingerlanneqalerpoq arnarlu oqaaseqartartoq nutaarsiassaqartitsivimmut dpa-mut oqarpoq, taama ajortigisumik pisoqarneranut akisussaaffiup eqqortup sumut inissinnissaa suli piaarpallaartoq.
