Mexicop præsidentiata coronamik tunillanneqarsimagaluarluni Putin oqaloqatigerusukkaa
Mexicop præsidentia, Andrés Manuel López Obrador. coronavirusimik tunillanneqarsimavoq.
Præsidenti 67-inik ukiulik Twitterikkut unnuaq taama allappoq.
Napparsimanermut ersiuteqarpiarani nakorsaasersorneqarlunilu, taassuma ilanngullugu ilisimatitsissutigaa.
- Pisarnertulli neriulluarpunga, López Obrador ilanngullugu oqarpoq.
Præsidenti nakorsamit ullut tamaasa nakkutigineqartassaaq, præsidentilu napparsimagaluarluni suliinnassalluni aalajangerpoq.
Ruslandip præsidentianik Vladimir Putinimik russit coronavirusimut akiuussutissaaliaata Sputnik V-p Mexicomit atorneqalersinnaanissaa pillugu oqaloqateqarnissani taamaasilluni pilersaarutigaa.
AAMMA ATUARUK Mexicomi Brasiliamilu coronavirusimik toqquteqartut amerleriapiloortut
Coronavirus Mexicomi tuniluutipilooqqilerpoq, nappaammillu toqquteqartut 150.000-t ulluni tulliuttuni sinnissagaat ilimagineqarluni.
Coronavirusi siorna tuniluutilermalli Mexicomi inuit 1,7 millioninit ikinnerunngitsut tunillanneqarsimapput.
Illoqarfiit pingaarnersaanni Mexico Citymi napparsimmaviit ulikkaangajalerput. Coronavirusip tuniluutipilooqqilernera pissutaalluni Mexico Citymi napparsimmaviit 90 procentinik ulikkaaqqapput.
Mexico Citymi oqartussat coronavirusi siaruatsaaliniarlugu assigiinngitsutigut killilersueqqilerput.