Mexicop avataani uuliap aniaffia mileriaqqinneqalerpoq

Uulia akuiarneqanngitsoq liiterinik millionerpassuarnik annertussusilik maanna qaammat ataaseq sinnerlugu immamut maqisoq, marullummik tonserpassuarnik oqimaassusilimmik cementimillu uuliap aniaffia milinniarlugu misiliisoqarniarpoq.

Umiarsuit arlallit lastii marullummik ulikkaarlugit usilersorneqarsimasut, ruujorip uuliap maqiffiata qulaani maanna piareersimapput. Milluaat sakkortoorujussuaq slangellu takisoorsuit atorlugit, marulluk ruujorimut uuliap maqiffianiittumut kuutsinneqassaaq, taamaalilluni uuliap maqinera unitsinneqarsinnaaniassammat.

Milluaassuaq 30.000 hestekræftinik sakkortussusilimmik motoorilik, marullummik 8.000 liiterimik minutsimut milluaasinnaavoq.

Marulluup ventiili milissinnaassagaa neriuutigineqarpoq, taamaalilluni ruujori uuliap maqiffia milinneqarniassammat.

Tamanna iluatsissinnaassappat marulluk miligutigineqartoq cementerujussuarmik naqiguserniarneqarpoq.

Taamatut assingusumik mingutsitsineq siornatigut taamaalillugu milinneqarsinnaasarsimavoq, maannali immami aatsaat taama ititigisumi misilinneqassalluni.

Mexicop Kangerliumanersuani ruujori maqisoorfiusoq 1.500 meterinik itissusilimmiimmat, milinniarneranut tamanna ilungersunartorsiortitsivoq.